ՀՀ վաստակավոր արտիստուհի Էլլադա Չախոյան, բժշկական գիտությունների թեկնածու Ռուբեն Ղազարյանն ու Արամ Ղազարյանը բաց նամակով դիմել են ՀՀ նախագահ Սերժ Սարգսյանին:
Նամակում, մասնավորապես ասվում է. «Մեծարգո պարոն նախագահ Սերժ Սարգսյան,
Ինչպես հայտնի է, 2013 թվականին նշվում է հռչակավոր կոմպոզիտոր Արամ Խաչատրյանի ծննդյան 110-ամյակը: Մամուլից մեզ հայտնի դարձավ, որ Լոս Անջելեսի Walt Disney Concert Hall hեղինակավոր համերգասրահում գալահամերգով բացվել է Արամ Խաչատրյանի ծննդյան 110-ամյակին նվիրված երաժշտական փառատոնը՝ կազմակերպությամբ ՀՀ գլխավոր հյուպատոսության:
Ավաղ, ափսոսանքով պիտի նշել, որ իրականում, այսպես կոչված, «Լոս Անջելեսում Արամ Խաչատրյանին նվիրված փառատոնի» բացումը, պարզվում է, ոչ այլ ինչ է եղել, քան խաբեություն, որով փաստվում է այն անհարգալից վերաբերմունքը, որ ցուցաբերել են կազմակերպիչները Արամ Խաչատրյանի հանդեպ: Մի քանի ամիս առաջ, Հայաստանի գլխավոր հյուպատոսության կողմից մամուլում հայտարարվեց, որ Արամ Խաչատրյանի 110-ամյակի առթիվ Լոս Անջելես քաղաքում հայտարարվում է «Արամ Խաչատրյանի տարի» և այդ առիթով նկատի է առնվում համերգներ Լոս Անջելեսի ֆիլհարմոնիկ ու կամերային նվագախմբերի մասնակցությամբ, ինչպես նաև հայտարարություն այն մասին, որ կատարվելու է կոմպոզիտորի Ջութակի կոնցերտը՝ հռչակավոր Հոլիվուդ բոլ ամֆիթատրոնում: Պարզվեց, որ վերը նշված նվագախմբերի համերգային ծրագրերում նման բան գոյություն չունի, իսկ Լոս Անջելեսի քաղաքապետարանում էլ ոչ ոք 2013 թվականը չի հայտարարել «Արամ Խաչատրյանի տարի», իսկ Ջութակի կոնցերտի կատարումը Հոլիվուդ բոլում, ամբողջովին մտացածին է և հնարովի: Այնպես որ, առանց ժողովրդին տեղյակ պահելու, առանց հայտարարությունների ու հեռուստատեսային ծանուցումների, ծպտված, բոլորից թաքուն իրականացրած, այսպես կոչված, գալահամերգը երկպառակության, ասեկոսեների լայն ասպարեզ բացեց հասարակության առջև: Իրականում, հորինովի փառատոնի բացումը տեղի է ունեցել բոլորից գաղտնի, այն էլ ոչ թե Walt Disney Concert Hall -ում, այլ հեղինակավոր համերգասրահի միջանցքում, չորս երաժիշտներով և միայն քառասունի հասնող ներկաներով:
Դժվար է հավատալ, որ նման մոլորեցնող ապատեղեկատվությունը գալիս է Հայաստանի գլխավոր հյուպատոսության կողմից, որով հստակ կերպով երևում է նաև ընդգծված անհարգալից վերաբերմունքը մեր ժամանակի խոշորագույն կոմպոզիտոր, հայ ժողովրդի հպարտությունը հանդիսացող Արամ Իլյիչ Խաչատրյանի հանդեպ: Լոս Անջելեսի Հայաստանի գլխավոր հյուպատոսության նման աշխատաձևն ու լուրջ բացթողումները գալիս են անշուշտ հեղինակավոր, մասնագետ դիվանագետների բացակայությունից:
Նման խղճուկ, Արամ Խաչատրյանի պատվին ու փառքին անհարիր գալահամերգի կազմակերպում ՀՀ Լոս Անջելեսի գլխավոր հյուպատոսության կողմից, ապացուցում է Արամ Խաչատրյանի ծննդյան 110-ամյակին նվիրված փառատոնի կեղծ լինելը: Հուսով ենք, Հայաստանի Հանրապետության կառավարությունը պատշաճ կարժևորի ստեղծված իրավիճակը»:
