Այսօր Շինարարի տոնին նվիրված միջոցառմանը ներկա էր նաև Նարեկ Սարգսյանը, ով երեկ վարչապետ Տիգրան Սարգսյանի որոշմամբ նշանակվեց Հայաստանի Հանրապետության կառավարությանն առընթեր ճարտարապետության պետական կոմիտեի նախագահ:
Լրագրողների հետ զրույցում Նարեկ Սարգսյանը խոսեց կոմիտեի ստեղծման նպատակներից:
Նա հիշեցրեց, որ նախկինում կար քաղաքաշինության նախարարության ճարտարապետական վարչություն, որը նախկին ճարտարապետների պետական կոմիտեից առանձնացավ և 1995 թվականին մտավ քաղաքաշինության նախարարության մեջ, և հիմա առանձնանում է:
Կոմիտեի գործառույթները կլինեն ճարտարապետությանն առնչվող բազմաթիվ հարցերի վեր հանումը:
Նարեկ Սարգսյանը հավելեց, որ 15 օրից կոմիտեի լիազորությունները կներկայացվեն կառավարություն:
Նրա խոսքով՝ ժամանակը ցույց տվեց, որ բազմաթիվ հակասություններ են առաջանում «Տեղական ինքնակառավարման մասին» ՀՀ օրենքի հետ կապված:
«Միայն այն փաստը, որ քաղաքների գլխավոր ճարտարապետներից միայն քսանհինգ տոկոսն ունի ճարտարապետի դիպլոմ (դեռ խոսում եմ դիպլոմների մասին, կարողությունների մասին չեմ խոսում), ինքնին նշանակում է, որ դաշտը տարրալուծվել է և նորմալ չի կառավարվում»,- ասաց նա՝ հավելելով, որ նախկինում բոլոր գլխավոր ճարտարապետները ենթարկվում էին ճարտարապետների պետական կոմիտեին՝ պետշինին:
«Շատ խնդիրներ կան, որ կառավարության տարբեր գերատեսչությունների մոտ տարաձայնություններ կարող են առաջացնել, և կոմիտեն կարող է լիարժեք համակարգել և իր մասնագիտական խորհուրդներով օգտակար լինել»,- ասաց Նարեկ Սարգսյանը:
Բացի այդ, նա նշեց, որ քաղաքները չունեն քաղաքաշինական կանոնադրություն, և կարևորեց կանոնադրության խնդրի լուծումը:
Իսկ այն, որ արդեն իր ընդդիմախոսները հավատ չեն ընծայում, թե փոփոխություն կլինի, Նարեկ Սարգսյանը ասաց նորմալ համարեց՝ ասելով, որ ընդդիմախոսներ պետք է լինեն, իսկ մնացածը աշխատանքը և կյանքը ցույց կտան:
Իսկ թե ինչու իրեն նշանակեցին այդ պաշտոնին, նրա խոսքով՝ այդ հարցը իրեն չպետք է ուղղեն:
