Այսօր Ազգային ժողովում քննարկման դրվեց վարչական իրավախախտման մասին և քրեական դատավարության օրենքում փոփոխություններ և լրացումներ կատարելու օրենքի նախագիծը: ՀՀ գլխավոր դատախազի տեղակալ Մնացական Սարգսյանը, ներկայացնելով օրենքը, նշեց, թե, նկատի ունենալով այն հանգամանքը, որ երկրի նախագահը դիմել է Ազգային ժողովին՝ համաներման մասին ՀՀ օրենք ընդունելու վերաբերյալ, առաջարկվել է ՀՀ քրեական դատավարության օրենքի նախագծում փոփոխություն կատարել:
Առաջարկությունը հետևյալն է. «ՀՀ Քրեական դատավարության 35-րդ հոդվածը վերանայել նոր պարբերությամբ: 35-րդ հոդվածը վերաբերում է քրեական գործի վարույթի կամ քրեական հետապնդումը բացառելու հանգամանքին: Ի՞նչ բովանդակություն է առաջարկվում առաջիկայում մտցնել այս կետում: Սույն հոդվածի 13-րդ կետում նշված հիմքում գործի վարույթի կամ գործի վարույթի հետապնդման դադարեցում չի թույլատրվում, եթե չի հատուցվել կամ այլ կերպ չի հարթվել հանցագործության պատճառված վնասը կամ առկա վեճը, այս դեպքում գործի վարույթը շարունակվում է սովորական կարգով»,- պարզաբանեց Սարգսյանը:
Թե ինչով է պայմանավորված այս փոփոխությունը, Մնացական Սարգսյանը մեկնաբանեց, որ նախորդ համաներման ժամանակ հակասություն է առաջացել: Այս որոշումը մտցնելու դեպքում, ըստ նրա, այլևս խնդիրներ չեն լինի:
ԱԺ պետաիրավական հարցերով հանձնաժողովի նախագահ, ԱԺ պատգամավոր Դավիթ Հարությունյանը ավելացրեց, որ այստեղ տեխնիկական վրիպակ է տեղի ունեցել, և օրենքը ուժի մեջ է մտնելու ոչ թե 10 օրից, այլ օրենքի ընդունման հաջորդ օրը: