Միացյալ Նահանգների պետքարտուղար Ջոն Քերին երկուշաբթի հայտարարել էր Ջեյմս Ուորլիքին ԵԱՀԿ Մինսկի խմբի համանախագահ նշանակելու որոշման մասին:
«Առաջին լրատվական»-ն այս մասին զրուցեց Ֆրանսիայի Ռազմական հետազոտությունների հիմնադրամի փորձագետ, քաղաքական վերլուծաբան Կայծ Մինասյանի հետ, ով նշեց, որ քաղաքականության մեջ առանց նշանակության որևէ փոփոխություն չի կատարվում, քաղաքական փոփոխությունները միշտ կարևոր են, ԱՄՆ-ն ուզում է հզորացնել իր ներկայությունն այս տարածաշրջանում ոչ միայն ֆինանսապես կամ քաղաքականապես, այլ՝ անձերով: Այս նշանակումն, ըստ Կայծ Մինասյանի, վկայում է այն մասին, որ ԱՄՆ Պետքարտուղարությունը կարևորություն է տալիս այս տարածաշրջանին և ցույց է տալիս, որ առանց ԱՄՆ-ի անկարելի է որևէ խաղաղարար ծրագիր կամ բանակցություն վարել:
«ԱՄՆ-ն այս կերպ ցույց է տալիս, որ այլևս այդ շրջանը ՌԴ-ին չի պատկանում, խոսք և գործ ունի անելու այդտեղ»,- ասաց Կայծ Մինասյանը:
Վերջինիս համոզմամբ՝ Հայաստանը պետք է կարևորություն տա անվտանգության բաղադրիչին, ՀՀ իշխանություններն ավելի ակտիվ, աշխույժ դիվանագիտություն պետք է ծավալեն, նախաձեռնողական դիվանագիտություն իրականացնեն, ակտիվորեն պետք է օգտագործեն Սփյուռքը՝ իբրև լծակ:
Հիշեցնենք, որ Ուորլիքն իր պարտականությունները կստանձնի սեպտեմբերից: Նախկինում նա եղել է Աֆղանստանի և Պակիստանի հարցերով ԱՄՆ նախագահի հատուկ ներկայացուցչի տեղակալը։ Մինչ այդ նա զբաղեցրել է Բուլղարիայում ԱՄՆ դեսպանի պաշտոնը (2009-2012) և այլ կարևոր պաշտոններ՝ ԱՄՆ Պետդեպարտամենտում։
