Ըստ որոշ վիճակագրական տվյալների՝ մարդիկ օրական 400 և ավելի գրամ հաց են ուտում:
«Դա, իհարկե, լավ օրից չէ, նորմալ չէ, բայց իրականություն է: Հատկապես անվճարունակ խավի համար հացը սննդի հիմնական մասն է, և դրա համար էլ պետությունը ավելի շատ ուշադրություն պետք է դարձնի այս ոլորտին: Այսօր հացը՝ որպես հիմնական սննդատեսակ, խիստ մտահոգություններ է առաջացնում»,- նշում է Սպառողների ասոցիացիայի նախագահ Արմեն Պողոսյանը:
Նրա կարծիքով, այսօր մեր առաջնային խնդիրներից մեկը հացամթերքի քաշի և գնի անհամապատասխանությունն է: «Ժամանակին մեր կողմից անց կացված որոշ հետազոտությունների ու ստուգայցերի ընթացքում պարզվեց, որ մենք մինչև 30% օդ ենք գնում. հացը տեսքով մեծ է, տարբեր տեխնոլոգիական հնարքներով ուռեցնում են, և տպավորություն է ստեղծվում, թե մենք գնում ենք հաց: Իսկ իր պաշտոնական, պատշաճ քաշից պակասում է մինչև 30%»:
Այս ամենը, Արմեն Պողոսյանի դիտարկմամբ, վնաս է թե՛ մեր գրպանին, թե՛ առողջությանը. հիմնավոր կասկածներ կան, որ շատ դեպքերում օգտագործում են տարբեր գունանյութեր, արհեստական հավելումներ և սպառողներին շփոթության մեջ են գցում, թե իրենք արտադրում են տարեկանի հաց:
Այս խնդիրներով մտահոգ մասնագետները դիմել են պետական ատյաններին, սակայն, ինչպես իրենք են նշում, ապարդյուն:
«Այդ խնդիրը լուծող պետական կառույցը հիմա գտնվում է վերակառուցման ընթացքի մեջ: (Նախկինում դա կոչվում էր գյուղնախարարության որակի տեսչություն): Սա շատ ցավալի է, բայց պարբերաբար այսպես է արվում. անընդհատ ինստիտուցիոնալ փոփոխություններ են անում, կիսվում են, տրոհվում են, նորից միանում են: Ու երբ ահազանգում ենք այս խնդիրների վերաբերյալ կամ սննդի հետ կապված այլ վիճահարույց հարցերով, միշտ պատասխանը մեկն է՝ սպասեք ևս մի քանի ամիս, մինչև կառույցի վերակառուցման փուլն ավարտվի»:
