Խորհրդարանն այսօր սկսեց քննարկել ՀՀ Ընտրական օրենսգրքի և կից օրենքների նախագծերի փաթեթները երկրորդ ընթերցմամբ ընդունելու հարցը:
ԱԺ նախագահի տեղակալ Սամվել Նիկոյանը տեղեկացրեց, որ երկրորդ ընթերցման ներկայացնելու փուլում ավելացել են «ՀՀ վարչական դատավարության մասին օրենքում» փոփոխություններ կատարելու մասին օրենքի նախագիծը և ՀՀ ՔՕ-ում փոփոխություններ կատարելու մասին օրենքի տասներորդ հոդվածը:
ԱԺ պետական-իրավական հարցերի մշտական հանձնաժողովի նախագահ, հիմնական զեկուցող Դավիթ Հարությունյանը տեղեկացրեց, որ առաջին ընթերցումից հետո տեղի են ունեցել բազմաթիվ քննարկումներ, եղել են հանդիպումներ այն անձանց հետ, ովքեր թե´ մինչև առաջին ընթերցումը, թե´ առաջին ընթերցումից հետո ներկայացրել էին իրենց առաջարկությունները:
Իրականացվել են նաև հանրային քննարկումներ, որոնց մասնակցել են նաև միջազգային կառուցների փորձագետներ:
«Նախագծում առկա են մի շարք էական փոփոխություններ: Եթե մենք հետևենք ֆորմալ ընթացակարգին, ապա այժմ պետք է ներկայացնեմ միմիայն այն հոդվածները, որոնք փոխված կամ հանված են»,- ասաց ԱԺ պետական-իրավական հարցերի մշտական հանձնաժողովի նախագահը:
Դավիթ Հարությունյանն ընդգծեց այն մոտեցումը, որն առաջին անգամ չի հնչում և եղել է ԵԱՀԿ ԺՄԻԳ-ի ու Վենետիկի հանձնաժողովի նախորդ և հերթական կարծիքներում: Այն է` միայն օրենսդրությունը չի կարող երաշխավորել ընտրական հանձնաժողովների անդամների արհեստավարժությունը, ազնվությունը և անկողմնակալությունը:
Նրա խոսքով և´ ընտրական հանձնաժողովների կազմավորման, և´ վարչարարության բարեխիղճ կատարումն այն կարևորագույն գործոնն է, որը կարող է բարձրացնել ընտրական վարչարարության հանրային վստահությունը:
«Որևէ մեկս կասկածի տակ չի առնում նման հարցադրումը»,- ասաց նա՝ նշելով սակայն, որ էական հարց է ծագում, թե այդ դեպքում ինչո՞ւ ենք մենք փոխում ԸՕ-ն, և արդյո՞ք այս փոփոխությունները կփոխեն ընտրական վիճակը երկրում:
«Մեր խորին համոզմամբ, ԸՕ-ն պետք է պատասխան տա այդ թերություններին և այն առկա կամ ենթադրյալ թերություններին, որոնք նշմարվել են նախորդ ընտրությունների ժամանակ: Մեր խնդիրն այնպիսի մեխանիզմներ առաջարկելն է, որոնք կունենան կանխարգելիչ նշանակություն, և երկրորդ` կբարձրացնեն հանրային վստահությունը»,- հայտնեց Դավիթ Հարությունյանը:
Ըստ պատգամավորի, կանխարգելիչ մեխանիզմը հույժ կարևոր է, որովհետև եթե անգամ առկա են անձինք, ովքեր խախտումների գնալու գայթակղություն ունեն, ապա ի սկզբանե պետք է ամրագրել մեխանիզմներ, որոնք այդ գայթակղության ցանկությունը կամ հնարավոր անպատժելիության շանսը կնվազեցնեն: «Մենք պարտավոր ենք ապահովել այնպիսի հավասարակշռված մեխանիզմեր, որ, երբ դուք լսեք մեղադրանքներ, քննադատություններ, թե առկա են այսպիսի խախտումներ, ձեր մեջ առաջին հերթին ծագի հետևայլ հարցը. «Արդյոք դա հնարավո՞ր է»: Ցավոք, մենք շատ հաճախ ավելի հակված ենք բացասական բաներին հավատալու, ուստի պետք է այդ կասկածամտությունը նվազեցնող մեխանիզմներ ևս ստեղծվեն»,- ԱԺ ամբիոնից հայտարարեց Դավիթ Հարությունյանը՝ ավելացնելով, որ օրենսգիրքը փորձել են այդ տեսանկյունից լրամշակել:
Այնուհետև նա մանրամասն, հոդված առ հոդված ներկայացրեց փոփոխությունները:
