«Նոր ժամանակներ» կուսակցության նախագահ Արամ Կարապետյանը կարծում է, որ այս իշխանությունների օրոք Մարտ 1-ը չի բացահայտվի, քանի որ իշխանությունում բոլորն այդ գործով կապված են իրար:
Այնուամենայնիվ, Արամ Կարապետյանի կարծիքով, ՀՔԾ-ն կհարցաքննի և՛ Լևոն Տեր-Պետրոսյանին, և՛ Ռոբերտ Քոչարյանին: Ավելին, Կարապետյանը նշեց, թե տարօրինակ է, որ առ այսօր նրանք չեն հարցաքննվել, ընդ որում, Լևոն Տեր-Պետրոսյանի անունը միշտ առաջինն է նշվել՝ որպես հետընտրական հանրահավաքների կազմակերպչի:
Ըստ նրա` տարօրինակ է նաև Ռոբերտ Քոչարյանին չհարցաքննելը, քանի որ ԱԺ նախկին նախագահ Տիգրան Թորոսյանի հայտարարությունները նշանակում են` Քոչարյանը ՀՀ-ում ռազմական հեղաշրջում է իրականացրել: «Ի՞նչ է, Ռոբերտ Քոչարյանի տեղը երեք տարի չգիտեի՞ն: Գորիկ Հակոբյանի տեղը, Հայկ Հարությունյանի տեղը: Այդ շտաբի անդամներին, Տիգրան Թորոսյանին ինչո՞ւ չեն հարցաքննել: Մարդը «Ազատություն» ռադիոկայանին հայտարարում է, որ բանակի օգտագործման մասին ինքը տեղյակ չի եղել: Ուրեմն, Ռոբերտ Քոչարյանը երկրում ռազմական հեղաշրջում է արել»,- նշեց նա:
Արամ Կարապետյանը բացառեց Ռոբերտ Քոչարյանի` քաղաքականություն վերադարձը, քանի որ նա չարիք է ՀՀ համար: «Նա ներկայումս Մոսկվայում է, և լուրջ խնդիրներ են ծագել: Նա պետք է իմանա, որ վերադարձի ճանապարհը փակ է իր համար: Մարդ, ով մարտի 1-ին կրակել է ժողովրդի վրա ու հիմա հայտարարում է, թե ՀՀՇ-ն սպանություններ է արել… Իսկ ինքը՝ որպես նախագահ, ի՞նչ է արել դրանք բացահայտելու համար»,- հայտարարեց նա:
