Այսօր՝ հոկտեմբերի 27-ին, ԳՄ նիստից հետո լրագրողների հետ զրույցում ԱԺ փոխխոսնակ Էդուարդ Շարմազանովը՝ անդրադառնալով հարցին՝ արդյոք վարչապետը դիմել է ՀՀԿ կուսակցության անդամակցելու համար, նշեց. «Կարեն Կարապետյանը ՀՀԿ կուսակցությանը անդամակցելու համար դիմի, չդիմի՝ նա Հայաաստանի հանրապետական կուսակցության թիմի առանցքային ներկայացուցիչ է:
Այս թիմի քաղաքական ղեկավարն ու առաջնորդը Սերժ Սարգսյանն է և պարոն Կարեն Կարապետյանը մեր թիմի լիարժեք անդամն է եւ մենք լիարժեքորեն, իր հետ միասին կիսում ենք կառավարության պատասխանատվությանը: ՀՀԿ-ն ինչպես եղել Վազգեն Սարգսյանի կառավարության պատասխանատուն, այնպես էլ այսօր Կարեն Կարապետյանի կառավարության ամբողջական պատասխանատուն է»:
Էդուրդ Շարմազանովը հավելեց, որ Կարեն Կարապետյանի՝ ՀՀԿ կուսակցությանն անդամակցության հարցն այսօրվա ԳՄ նիստում չի քննարկվել:
Հայաստանի Հանրապետական կուսակցությունը Գագիկ Ծառուկյանի՝ ակտիվ քաղաքականություն հնարավոր վերադարձի հարց, Շրմազանովի հավաստմամբ, չի քննարկել: «Կուսակցությունն ունի իր քաղաքական օրակարգը, շարժվում է այդ օրակարգով, նախաձեռնում է լայնածավալ բարեփոխումներ, որոնք բխում են հանրապետության Նախագահի ծրագրային ելույթից, կառավարության ծրագրից և սահմանադրական բարեփոխումներից»,- նշեց Շարմազանովը:
Անդրադառնալով հարցին, թե Գագիկ Ծառուկյանի հայտարարությունից հետո, որ ներում է բոլորին, ՀՀԿ-ում կա՞ն մարդիկ, ովքեր իրենց ներված համարո՞ւմ են, Շարմազանովը պատասխանեց. «Ձեր նշած գործընկերոջ ներողամտության հետ կապված ես երեկ բոլոր լրատվամիջոցների հետ խոսել եմ, ավելացնելու բան չունեմ: Եթե կոնկրետ ինչ-որ հարցեր ունեք, տվեք այն մարդկանց, ով ներելու կամ ներվելու կարիք ունի: Ես ոչ ներելու, ոչ էլ ներվելու խնդիր ունեմ: Ես խոսել եմ բացառապես երևույթների մասին: Կրկնում եմ՝ քաղաքականության մեջ պետք է լինի կոռեկտություն, համերաշխություն, հանդուրժո ղականություն և քաղաքական մշակույթ: Բոլոր ոչ կոռեկտ գնահատականները պետք է լինեն անցյալում, իսկ ապագան, կարծում եմ, կլինի ավելի գեղեցիկ ու հանդուրժողական»:
ԲՀԿ նախկին առաջնորդ Գագիկ Ծառուկյանը հոկտեմբերի 26-ին լրագրողների հետ զրույցում չի բացառել, որ կարող է վերադառնալ քաղաքականություն, եթե լինի դրա անհրաժեշտությունը: Նա հայտարարել էր, որ բարի մարդ է, հիշաչար չէ ու բոլորին ներել է իր հասցեին հնչած վիրավորական արտահայությունների համար:
Մանրամասները՝ տեսանյութում:
