Business Грузия-ի փոխանցմամբ, Վրաստանի և Չինաստանի միջև սկսվում են կանոնավոր ավիաչվերթներ: Այս հարցը քննարկվել է Վրաստանի տնտեսության ու կայուն զարգացման փոխնախարար Գեորգի Կարբելաշվիլիի ու չինական China southern airlines ավիաընկերության պատվիրակության հանդիպման ժամանակ:
Վրաստանի ու Չինաստանի միջև առաջին չվերթը կատարվելու է 2011 թվականի հունիսի 9-ին, որն իրականացնելու է աշխարհի 4-րդ խոշորագույն China southern airlines ավիաընկերությունը:
Ուրումչի-Թբիլիսի-Ուրումչի չվերթն իրականացվելու է շաբաթական 3 անգամ` երեքշաբթի, հինգշաբթի ու շաբաթ: Թռիչքը տևելու է մոտ 5 ժամ:
Վրաստանի էներգետիկայի և կայուն զարգացման նախարար Վեռա Կոբալիան հայտարարել է, որ այս ավիաչվերթները կնպաստեն երկու երկրների գործարար շփումներին ու Վրաստանում չինական ներդրումների աճին, ինչպես նաև կաշխուժացնեն զբոսաշրջությունը:
Հիշեցնենք, որ չինական ներդրողները շահագրգռված են Վրաստանի էներգետիկ, գյուղատնտեսական (գինեգործության), դեղագործական, տրանսպորտային ու հաղորդակցային ոլորտներում խոշոր նախագծերի իրականացմամբ:
Արդեն պլանավորված է Վրաստանում կառուցել էլեկտրասարքավորումների ու բժշկական գույքի արտադրության գործարան: