Ճապոնական Nankai Electric Railway երկաթուղային ընկերությանը, որը ուղևորափոխադրում էր կատարում Կանսայի օդանավակայան, քննադատել են այն բանից հետո, երբ մեքենավարը ազգայնամոլական մեկնաբանություններ է արել: Այդ մասին հայտնում է Japan Today-ը:
Միջադեպը տեղի է ունեցել երկուշաբթի առավոտյան՝ Օսակայում: Մեքենավարը բարձրախոսով ներողություն է խնդրել ճապոնացի ուղևորներից այն բանի համար, որ գնացքում եղել են բազմաթիվ արտասահմանցիներ, ինչը կարող էր առաջացնել անհարմարավետություն: «Գնացքում այժմ շատ արտասահմանցիներ կան: Ներողություն ենք խնդրում անհարմարություն ստեղծելու համար»,- հայտարարել է նա:
Դա լսելով՝ Ճապոնիայի քաղաքացին դիմել է Nankai Electric Railway-ի ներկայացուցիչներին՝ խնդրելով պարզաբանել մեքենավարի վարքը:
Մեքենավարի խոսքերով՝ ինքը չի ցանկացել ոչ ոքի վիրավորել, այլ պարզապես պատասխանել է ուղևորներից մեկի ասածին այն մասին, որ «վագոնում արտասահմանցիների այդպիսի ամբոխը իրեն նյարդայնացնում է»:
Nankai Electric Railway-ը ներողություն է խնդրել իր աշխատակցի համար:
