«Ազատություն» ռադիոկայանի ադրբեջանական ծառայության փոխանցմամբ, «Ամերիկայի ձայն»-ին տված հարցազրույցի ժամանակ Ադրբեջանում ԱՄՆ դեսպան Մեթյու Բրայզան անդրադարձել է Ադրբեջանի ներքաղաքական խնդիրներին, երկու երկրների հարաբերություններին ու Ղարաբաղյան հակամարտության կարգավորմանը.
«Քաղաքական բարեփոխումների առումով պետք է նշել, որ, որոշ «հաջողությունների» հետ մեկտեղ, Ադրբեջանը հետընթաց է ապրել: Խոսքը լրագրողների և բլոգերների ձերբակալությունների մասին: Ես այդ խնդիրը բազմիցս քննարկել եմ Ադրբեջանի կառավարության անդամների հետ:
Մենք ցանկանում ենք, որ Ադրբեջանը գնա ոչ թե քաղաքական ավտորիտարիզմի ու իսլամական էքստրեմիզմի ճանապարհով, այլ՝ այլընտրանքային ուղով: Թվում է, թե Ադրբեջանը ճիշտ ճանապարհ է ընտրել և պետք է շարունակի առաջ շարժվել այդ ճանապարհով:
Կարճատև պլանում որոշ բարեփոխումներ կարող են թվալ ռիսկային, սակայն երկարատև հեռանկարում դրանք կնպաստեն կայունությանը: ԱՄՆ-ը մշտապես աջակցում է ազատ հանրահավաքներ անցկացնելուն և Ադրբեջանի կառավարության հետ բանակցելիս այդ հարցը մշտապես պահում է իր ուշադրության կենտրոնում:
Ինչ վերաբերում է ԱՄՆ-ի և Ադրբեջանի միջև էներգետիկ համագործակցությանը, ապա այն կարելի է անվանել հաջող: Հուսով եմ, որ Ադրբեջանը, ընդլայնելով իր էներգետիկ արտահանման հնարավորությունները, սեփական ներդրումը կունենա Եվրոպայի գազամատակարարման դիվերսիֆիկացման մեջ:
Ադրբեջանը ԱՄՆ-ի հետ համագործակցում է նաև դեպի Աֆղանստան խաղաղապահ ուժերի համար նախատեսված բեռների առաքման հարցում»:
Երկրորդ տարին անընդմեջ հետաձգված ամերիկա-ադրբեջանական համատեղ զորավարժությունների («Տարածաշրջանային պատասխան 2011») առնչությամբ Բրայզան խնդրել է հարցը հասցեագրել ադրբեջանական կողմին:
Բրայզան պատասխանել է նաև Ադրբեջանի նախագահի աշխատակազմի արտաքին կապերի հարցերով բաժնի ղեկավար Նովրուզ Մամեդովին, որը քննադատել էր ԱՄՆ-ին ու միջազգային կառույցներին Ղարաբաղի հարցում «անարդար» դիրքորոշում ունենալու համար.
«Հակամարտության արդարացի կարգավորման համար բանակցությունների սեղանին առկա են արդար առաջարկներ: Պարզապես մնացել է վերջնական մշակման հասցնել դրանք: Քանի դեռ հակամարտող կողմերը չեն հանգել համաձայնության, հավասարակշռված մոտեցման մասին խոսք անգամ լինել չի կարող»:
Հիշեցնենք, որ 2010 թվականի դեկտեմբերի 30-ին ԱՄՆ նախագահ Բարաք Օբաման, օգտվելով նրանից, որ Կոնգրեսը գտնվում է արձակուրդում, Բրայզային նշանակեց Ադրբեջանում ԱՄՆ դեսպանի պաշտոնում: Ի դեպ, Օբաման նրան Ադրբեջանում ԱՄՆ դեսպանի պաշտոնում նշանակել էր դեռևս 2010 թվականի մայիսին:
Ապա դա հաստատել էր Սենատի Արտաքին հարաբերությունների հանձնաժողովը, սակայն հայամետ սենատոր Բարբարա Բոքսերի (որը դարձյալ վերընտրվել է Սենատում) ջանքերով Բրայզայի թեկնածությունը քվեարկության չդրվեց Սենատի լիագումար նիստում և հանվեց օրակարգից: Այժմ Բրայզան, ինչպես նաև Թուրքիայում ԱՄՆ դեսպան Ֆրենսիս Ռիկիարդոնեն սպասում են Սենատում իրենց թեկնածության վավերացմանը:
