Ադրբեջանական APA լրատվական գործակալության փոխանցմամբ՝ ԵՄ-ը 13.5 միլիոն եվրո է հատկացրել Ադրբեջանին տնտեսության զարգացման համար: Այդ մասին հայտնել է Ադրբեջանում ԵՄ-ի ներկայացուցչությունը:
Վերջինս մանրամասնել է, որ այդ գումարն ուղղվելու է փոքր ու միջին բիզնեսի մրցունակության բարձրացմանը, արտահանման հնարավորությունների ընդլայնմանը, ինչպես նաև բիզնես միջավայրի բարելավմանը:
Դա իրականացվելու է «Տեխնիկական համագործակցության հիմնադրամ» ծրագրի շրջանակներում: ԵՄ-ն Ադրբեջանի հիմնական առևտրային գործընկերն է:
2015 թվականին ԵՄ-ին բաժին է ընկել Ադրբեջանի ապրանքաշրջանառության ողջ ծավալի 47.5 տոկոսը, իսկ այս տարվա առաջին եռամսյակում՝ 43 տոկոսը: Վերջին 10 տարում ԵՄ-ի երկրների ներդրողները Ադրբեջանում ներդրել են 20 միլիարդ դոլար, որից 2.7 միլիարդ դոլարը բաժին է ընկել տնտեսության ոչ նավթային սեկտորին:
