Լեհաստանի ոստիկանությունը կենտրոնական Մազովեցի վոյեվոդությունում անտառում հայտնաբերել է Երկրորդ համաշխարհային պատերազմի ժամանակների 412 արկ: Այս մասին հայտնում է TASS-ը՝ հղում անելով երկրի ոստիկանության Գլխավոր քննչական վարչությանը:
Յուրահատուկ գտածոն եղել է Ռուժան տեղանքում: «412 արկերի մեջ կային 322 ականանետային ական և 90 հրետանային արկ»,- նշել է վարչության մամլո քարտուղար Ագնեշկա Գամելուշը: «Գտածոն փոխանցվել է սակրավորներին»,- ավելացրել է նա:
Ոստիկանությունը ենթադրում է, որ հայտնաբերված արկերը կարող էին պայթուցիկ նյութերի անօրինական աղբյուր լինել: Արկերը ընդհանուր առմամբ պարունակել են 203 կգ տրոտիլ: Որոշ ականներ արդեն առանց պայթուցիչների են եղել:
