Որքան շատ ենք խոսում Արցախի խնդրից, այնքան հասարակության մոտ անորոշությունն ավելի է աճում։
Այս մասին այսօր կազմակերպված ՌԱՀՀԿ սեմինար քննարկման ժամանակ ասաց փորձագետ Էդգար Վարդանյանը։
Սեմինարի թեման էր՝ «Ղարաբաղյան խնդիրը Հայաստանում և միջազգային ասպարեզում. Նոր վիճակ, հին մոտեցումներ»։
«Գործող իշխանությունները, որ պետք է որոշակի հստակություն մտցնեին այս հարցում, մեղմ ասած, բավարար պարզեցում չեն մտցնում»,- նշեց սեմինար-քննարկումը վարող Էդգար Վարդանյանը և ավելացրեց, որ ինչպես քաղաքական շրջանակներն, այնպես էլ հասարակական շրջանակները հիմնականում ինքնաբացառում են իրենց այս խնդրից՝ որպես ապացույց մատնանշելով անցյալ տարվա դեկտեմբերին խորհրդարան մտած ԼՂՀ ճանաչման վերաբերյալ օրենքի նախագիծը, որի շուրջ, ըստ բանախոսի՝ բովանդակային քննարկում գրեթե չեղավ։
«Երբ խոսք է գնում Ղարաբաղից, հիմնականում շրջանառվում է 2 հիմնական «կլիշե» ու սրանց վերաբերյալ բովանդակային քննարկում-վերլուծություն չի կատարվում։ Առաջինը, որ՝ մինչ Ղարաբաղի խնդիրը չլուծվի, Հայաստանը չի զարգանա, և երկրորդը՝ չլուծված խնդիրն օր օրի մեծացնում է պատերազմի հավանականությունը»,- ասում է փորձագետն ու փաստում՝ չնայած այսօր հաճախակիացել են զինադադարի խախտումները, մարդկանց մոտ, բնականաբար, ավելի մեծացել է վտանգի զգացողությունը, սակայն դա նույնպես չի բերում բովանդակային քննարկումների. անորոշություն ու անհստակություն կա, և այս պարագայում ավելի է կարևորվում փորձագիտական կարծիքների, վերլուծությունների դերը, ինչի համար էլ կազմակերպվել էր սեմինար-քննարկումը:
Զեկույցներով ներկայացան նաև ՌԱՀՀԿ տնօրեն Մանվել Սարգսյանը և Միջազգային իրավունքի մասնագետ Անդրեաս Ղուկասյանը: