2016 թ.-ի օգոստոսին Հայաստանի բոլոր մարզերում և մայրաքաղաքում Հելսինկյան Քաղաքացիական Ասամբլեայի Վանաձորի գրասենյակի կողմից «Հասարակական հետազոտությունների առաջատար խումբ» հասարակական կազմակերպության (APR Group) ներգրավմամբ իրականացվել է սոցիոլոգիական հետազոտություն, որում առաջադրված խնդիրներից է եղել նաև պարզել հասարակության դիրքորոշումը Հայաստանի՝ դեպի Հյուսիս կամ Արևմուտք կողմնորոշման վերաբերյալ:
«Հասարակական հետազոտությունների առաջատար խումբ» հասարակական կազմակերպության ղեկավար, սոցիոլոգ Ռուբեն Սարգսյանն «Առաջին լրատվական»- ի հետ զրույցում նշեց, որ այս հետազոտությունն իրականացվել է նաև 2014-ին և 2015-ին: Այս տարվա տվյալները համեմատվելով նախորդ երկու տարիներին ստացված տվյալների հետ՝ սոցիոլոգը նշեց, որ 2014-ին ԵՄ-ին նախապատվություն տվողների թիվը կազմել է 25 տոկոս, ԵՏՄ-ին՝ 38 տոկոս, 2015-ին՝ ԵՄ-ին՝ 24 տոկոս, իսկ ԵՏՄ-ին՝ 36 տոկոս: «Այս տարի կտրուկ փոփոխություն նկատվեց, որը մեզ համար էլ է անսպասելի. հետազոտության արդյունքները ցույց տվեցին, որ բնակչության 41 տոկոսը նախապատվություն է տալիս ԵՄ-ին, իսկ ԵՏՄ-ին՝ 25 տոկոսը»,- նշեց Ռ. Սարգսյանը:
Սոցիոլոգի խոսքով՝ նախկինում 18-25 տարեկաններն էին ԵՄ-ին նախապատվություն տալիս, իսկ այս տարի բոլոր տարիքային խմբերում բարձր է ԵՄ-ին նախապատվություն տվողների տոկոսը:
Ռուսաստանը մնում է բարեկամ, սակայն նախապատվություն է տրվում դեպի Եվրամիություն քայլ կատարելուն: Սոցիոլոգի խոսքով՝ հետազոտությունը ցույց տվեց, որ այս միտումը քաղաքականության հետ կապ չունի, սակայն այս հետազոտության շրջանակներում պատճառներն ի հայտ չեն գալիս: Ռ. Սարգսյանի կարծիքով՝ հնարավոր է, որ դա կարող է կապված լինել ակնկալիքների չիրականացման հետ, նաև ապրիլյան պատերազմի զարգացումները կարող են ազդեցություն թողած լինել:
Մանրամասները՝ տեսանյութում:
