«Առաջին լրատվական»-ի տեղեկություններով՝ ՀՀԿ անդամ Մենուա Հարությունյանը ցանկանում է պատգամավոր դառնալ և այդ նպատակով մեծամասնական ընտրակարգով իր թեկնածությունն է առաջադրել Սյունիքի մարզի թիվ 38 ընտրատարածքում:
Հիշեցնենք, որ այդ ընտրատարածքից պատգամավորական աթոռը թափուր է մնացել այս շաբաթ պատգամավոր Վահե Հակոբյանին Սյունիքի մարզպետ նշանակելուց հետո: Վերջինս Սյունիքի մարզպետ նշանակվեց նախկին մարզպետ Սուրիկ Խաչատրյանի հրաժարականի արդյունքում:
Կենտրոնական ընտրական հանձնաժողովը թիվ 38 ընտրատարածքում արդեն ընտրության օր է նշանակել՝ սեպտեմբերի 29: Իսկ թեկնածուների առաջադրումը տեղի կունենա օգոստոսի 5-ից մինչև 15-ը: Այսինքն՝ Հանրապետական կուսակցությունը առաջիկա երկու շաբաթներին Գործադիր մարմնի նիստում պետք է քննարկի, թե այդ ընտրատարածքում ում թեկնածությունն է առաջադրելու:
ՀՀԿ կազմակերպչական հանձնաժողովի նախագահ և ԳՄ անդամ Ռուբեն Թադևոսյանը մեզ հետ հեռախոսազրույցում ասաց, որ կուսակցությունում դեռ այդ հարցը չեն քննարկել և կքննարկեն սահմանված ժամկետում՝ մինչև օգոստոսի 5-ը տեղի ունենալիք ԳՄ նիստում: Մեր այն դիտարկմանը, թե Մ. Հարությունյանը ցանկանում է ՀՀԿ-ի կողմից առաջադրվել, հնարավո՞ր է, որ կուսակցությունը հենց նրան առաջադրելու որոշում կայացնի, Ռ. Թադևոսյանը կրկնեց, որ կուսակցությունը այդ ընտրատարածքում թեկնածու առաջադրելու հարց դեռ չի քննարկել:
«Իսկ Մ. Հարությունյանը կարող է առաջադրվել, բայց կուսակցությունում այդ հարցը չենք քննարկել: ՀՀ օրենսդրության համաձայն՝ թեկնածուները կարող են ինքնաառաջադրվել կամ առաջադրվել կուսակցության կողմից»,- ավելացրեց նա:
Նշենք, որ Մ. Հարությունյանի ղեկավարած կայքը այն եզակի լրատվամիջոցն էր, որը պաշտպանեց կամ գոնե չքննադատեց Ս. Խաչատրյանին նրա ընտանիքի անդամների կողմից Ավետիք Բուդաղյանին սպանելու համար: Ավելին՝ նա անընդհատ փորձել է ունենալ Ս. Խաչատրյանի բարեհաճությունը նույնիսկ «Մարիոթ» հյուրանոցում տեղի ունեցած այն հայտնի դեպքից հետո, երբ Սյունիքի նախկին մարզպետը նույն Մ. Հարությունյանի ներկայությամբ հարվածել էր նրա հորաքույր՝ գործարար Սիլվա Համբարձումյանին: Եվ այժմ Մ. Հարությունյանը ցանկանում է այդ ընտրատարածքից ընտրվել նույն Ս. Խաչատրյանի աջակցությամբ:
Ի դեպ, Մ. Հարությունյանը ցանկանում էր պատգամավոր դառնալ դեռ անցած տարվա խորհրդարանական ընտրությունների ժամանակ: ՀՀԿ-ն նրան չընդգրկեց համամասնական ցուցակի անցողիկ տեղերում: Հետագայում նա սկսեց աշխատել Երևանի Էրեբունի վարչական տարածքի ընտրատարածքներից մեկից առաջադրվելու ուղղությամբ, բայց իր կուսակցությունից դա նրան թույլ չտվեցին: Եվ այժմ այդ առումով նրա առջև նոր հեռանկար է բացվել, և Մ. Հարությունյանը փորձում է ստանալ Սերժ Սարգսյանի համաձայնությունն այդ ընտրատարածքից առաջադրվելու համար:
