Եվրասիական տնտեսական միության (ԵԱՏՄ) և Սերբիայի միջև ազատ առևտրի մասին համաձայնագրի նախագիծը պատրաստ կլինի հոկտեմբերի սկզբին: Այդ մասին Բելգրադում հայտարարել է ՌԴ-ի դեսպան Ալեքսանդր Չեպուրինը՝ փոխանցում է RIA Novosti-ն։
Նա այդ մասին հայտնել է Սերբիայի կառավարության փոխնախագահ, առևտրի, զբոսաշրջության և հեռահաղորդակցությունների նախարար Ռասիմ Լյաիչի հետ օգոստոսի 30-ին կայացած հանդիպմանը: Մայիսի վերջին Եվրասիական բարձրագույն տնտեսական խորհուրդը որոշում է ընդունել Սերբիայի հետ բանակցություններ սկսել առևտրական ռեժիմի միասնականացման շուրջ, որի արդյունքը կդառնա ազատ առևտրի ընդհանուր գոտին միության բոլոր երկրների և Բալկանյան երկրի համար: Այն ժամանակ նշվել է, որ ԵԱՏՄ-ի միայն երեք երկրներ Սերբիայի հետ ունեն ազատ առևտրի համաձայնագիր: Այդ երկրներն են՝ Ռուսաստանը, Ղազախստանը և Բելառուսը, ընդ որում այդ համաձայնագրերի առանձին դրույթներ տարբերվում են: Սերբիայի, Հայաստանի և Ղրղզստանի միջև համանման արտոնյալ ռեժիմ սահմանված չէ, բայց այդ երկրների միջև ապրանքների երկկողմ առևտրում առավել բարենպաստման ռեժիմ է գործում:
«Ռուսական կողմը, իր գործընկերների հետ համագործակցությամբ, մինչև հոկտեմբերի սկիզբն ազատ առևտրի մասին համաձայնագրի նախագիծ կպատրաստի Սերբիայի և Եվրասիական միության միջև, որի մեջ մտնում են ՌԴ-ն, Բելառուսը, Ղազախստանը, Հայաստանը և Ղրղզստանը, այդ ժամանակ էլ կարող են բանակցություններ սկսվել դրա կնքման շուրջ»,-Ռուսաստանի դեսպանի խոսքը մեջբերում է Լյաիչի մամուլի ծառայությունը:
Սերբիայի փոխվարչապետը և Չեպուրինը հույս են հայտնել, որ այս համաձայնագիրը կստորագրվի որքան հնարավոր է շուտ, ինչը կբերի ազատ առևտրի ռեժիմին ենթակա ապրանքների ցուցակի ընդլայնման։
