Ստամբուլի «Ակոս» թերթի հայազգի լրագրող Արիս Նալջըն հայտնվել է Ադրբեջանի արտգործնախարարության «անցանկալի անձանց» տխրահռչակ և զավեշտալի «սև ցուցակում»:
«Ակոս» թերթն այդ առնչությամբ հայտնում է, որ այդ մասին Ադրբեջանի ԱԳՆ-ը տեղեկացրել է թերթին հղած էլեկտրոնային նամակում, որում որպես հիմնավորում նշվել է այն, որ Արիս Նալջըն «առանց Բաքվի թույլտվության» այցելել է Արցախ, հարցազրույց ունեցել տեղի պաշտոնյաների հետ և այդ մասին 2014 թվականին հոդված հրապարակել թուրքական T24 կայքում:
Նամակում նշվում է, որ Ադրբեջանի ԱԳՆ-ի կազմած «սև ցուցակում» ընդգրկվում են բոլոր այն օտարերկրացիները, որոնք առանց պաշտոնական Բաքվի թույլտվության այցելում են Լեռնային Ղարաբաղ:
591 հոգանոց անցանկալի անձանց ցուցակում նշված է Թուրքիայի քաղաքացի, գիտնական Էզգիսու Բիբերի անունը ևս:
Ադրբեջանում այդ զավեշտալի ցուցակն օգտագործվում է նաև իշխանություններին ընդդիմախոսներից ազատելու համար: Այսպես, ցուցակում է նաև երբեք Արցախ չայցելած «Ազատություն» ռադիոկայանի Բաքվի գրասենյակի աշխատակից Խադիջա Իսմայիլովան, որն իր լրագրողական բացահայտումներով մերկացրել է Ադրբեջանի իշխող՝ Ալիևների ընտանիքի կոռուպցիոն գործունեությունը։
Ադրբեջանի ԱԳՆ-ն իր «սև ցուցակում» ընդգրկել է նաև իշխանամետ haqqin.az լրատվական կայքի թղթակից Զաուր Ռասուլզադեին, որը համարձակվել էր քննադատել ԱԳՆ-ի աշխատանքը:
Ադրբեջանի ԱԳՆ «սև ցուցակում» հայտնված անձանց արգելվում է մուտք գործել այդ երկիր:
Articolo21.org կայքն ավելի վաղ հայտնել էր, որ Բաքվի իշխանությունների անցանկալի անձանց «սև ցուցակում» ընդգրկված են ամբողջ աշխարհի տարբեր երկրներից մոտ 600 անձանց անուններ:
