Ռուսաստանը, որը Սիրիայի նախագահ Բաշար Ալ-Ասադի «խոշորագույն հովանավորն է», տրամադրված չէ Սիրիայում քաղաքական կարգավորմանը, այդ պատճառով «Սիրիայի բարեկամներ» խմբի 11 երկրները պետք է սկսեն հարվածներ հասցնել արաբական հանրապետության զինված ուժերին: Ինչպես հաղորդում է ITAR-TASS-ը, այս մասին հայտարարել է ԱՄՆ Կոնգրեսը, մասնավորապես՝ զինված ուժերի հարցերով կոմիտեի նախագահ Կարլ Լևինը և հետախուզության հարցերով հատուկ կոմիտեի անդամ Էնգես Քինգը:
Լևինը և Քինգը հնգօրյա այցով մեկնել են Հորդանան և Թուրքիա, որի ժամանակ քննարկել են Սիրիայում տիրող իրավիճակը: Նրանց կարծիքով՝ Սիրիայում տեղի ունեցող իրադարձությունները կասկածի տակ են դրել ԱՄՆ-ի ազգային անվտանգության շահերը, բացի այդ՝ վտանգված է ԱՄՆ-ի դաշնակիցների՝ Թուրքիայի, Հորդանանի և Իսրայելի, ինչպես նաև տարածաշրջանում ռազմավարական գործընկերների կայունությունը:
Նրանց գնահատմամբ՝ սիրիացի փախստականների հոսքը զգալի ռեսուրսներ է խլում Թուրքիայից և սպառնում «հեղեղել Հորդանանը»: Դրա հետ մեկտեղ Լևինը և Քինգը ենթադրում են, որ Սիրիայում զինված հակամարտությունը փաստացիորեն վերածվել է պատերազմի՝ երեք կողմերի մասնակցությամբ, այդ թվում՝ Իրանի և լիբանանյան «Հըզբոլլահ» շարժման:
«Նրանց ազդեցության ընդլայնումը տարածաշրջանում, բնականաբար, չի համապատասխանում մեր շահերին»,- նշել են օրենսդիրները:
Բացի այդ, օրենսդիրները համոզված են, որ Օբամայի վարչակազմը պետք է ընդլայնի սիրիական ընդդիմությանը ցուցաբերվող օգնությունը և հրավիրի երկրների քաղաքական, զինվորական առաջնորդների, հետախուզության ղեկավարների հանդիպում, որոնք ցանկանում են վերջ դնել Ալ-Ասադի վարչակարգին:
Նրանք նաև զգուշացնում են, որ կարևոր է հասնել ոչ միայն Ալ-Ասադի հրաժարականին, այլ նաև նրան, որ Սիրիայում ստեղծվի նոր կառավարություն: Սենատորների կարծիքով՝ հակառակ դեպքում ընթացող հակամարտությանը կարող է փոխարինել ավելի երկարատև քաղաքացիական պատերազմը:
