ՄԱԿ-ի գլխավոր քարտուղար Պան Գի Մունը հայտարարել է, որ աճող մտահոգությամբ հետևում է Եգիպտոսում տեղի ունեցող իրադարձություններին: Այս մասին հայտնում է BBC-ն:
Պան Գի Մունը նշել է, որ համաձայն ստացվող տեղեկությունների՝ անվտանգության ուժերի ներկայացուցիչները սպանում և վիրավորում են ցույցերի ու կատաղի բախումների մասնակիցներին:
Ստացվում են նաև սարսափելի տեղեկություններ վերջին շաբաթվա ընթացքում անկարգությունների ժամանակ սեռական բռնությունների մասին՝ ասվում է ՄԱԿ-ի գլխավոր քարտուղարի հայտարարության մեջ, որում նա եգիպտացի զինվորականներին կոչ է արել պաշտպանել ցուցարարներին և կանխել հետագա բախումները:
Եգիպտոսում տեղի ունեցող բռնությունները դատապարտել են նաև ԱՄՆ-ի իշխանությունները, որոնք եգիպտացի զինվորականներին կոչ են արել հրաժարվել ուժի կիրառումից:
Ուրբաթ Մուհամմադ Մուրսիի կողմնակիցների ու հակառակորդների միջև տեղի ունեցած բախումների ժամանակ զոհվել է առնվազն 30 մարդ, վիրավորվել մի քանի հարյուրը:
