«Սասնա ծռեր» խմբի ասուլիսում Վարուժան Ավետիսյանը նշեց, որ իրենց պահանջներից չեն հրաժարվում, սակայն առանց փակագծերը բացելու՝ հայտնեց նաև, որ կա խնդրի լուծման երրորդ տարբերակ: Նա նաև ապատեղեկատվություն համարեց իրենց հանձնվելու մասին լուրերը:
«Ժառանգություն» կուսակցության փոխնախագահ Արմեն Մարտիրոսյանը «Առաջին լրատվական»-ի հետ զրույցում նշեց, որ պատանդների ազատ արձակմամբ հաստատվեց տղաների վերաբերյալ իր այն կարծիքը, որ նրանք այն մարդիկ չեն, որ երբևէ հայի արյուն թափեն կանխամտածված:
«Մենք գլոբալ խնդիրներ ունենք լուծելու, և խնդիրը ոչ թե անձերն ու անուններն են, այլ մենք կանգնած ենք պետություն կորցնելու խնդրի կամ պետությունը վերակերտելու հնարավորության առաջ»,- «Առաջին լրատվական»-ի հետ զրույցում ասաց Արմեն Մարտիրոսյանը:
«Այդ տղաները ցանկանում են ճգնաժամային իրավիճակից դուրս գալու գործընթաց սկսել և բերել որակական նոր փուլ»,- ասաց մեր զրուցակիցը՝ հավելելով, որ սա դեռ ճգնաժամ չէ, այլ դրա մեկ դրսևորում:
Անդրադառնալով Վարուժան Ավետիսյանի նշած՝ խնդրի լուծման երրորդ տարբերակին՝ Արմեն Մարտիրոսյանը կարծիք հայտնեց, որ նոր Սահմանադրությամբ նախագահի դերը, ըստ էության, նվազագույնի է հասցվում. «Քանի որ Վարուժան Ավետիսյանի նշած անցումային փուլի ժամանակ որոշակի լիազորություններ են փոխանցվում կառավարությանը, ապա այս դեպքում իսկապես ստեղծվում է մի իրավիճակ, երբ Սերժ Սարգսյանը մնալով նախագահ՝ ըստ էության, այլևս ազդեցություն չի գործում երկրի կառավարման գործում»:
Դիտարկմանը՝ «Նոր Հայաստան»-ը կարծես չփորձեց իրավիճակը վերցնել իր ձեռքը, և ուրեմն ո՞րն է այդ առումով Նիկոլ Փաշինյանից վրդովվելու պատճառը, Արմեն Մարտիրոսյանը արձագանքեց. «Այս պահին Ժիրայր Սեֆիլյանը կալանավորված է, Գարեգին Չուգասզյանը կապից դուրս է, Վարուժան Ավետիսյանը գտնվում է ՊՊԾ գնդում, բնականաբար՝ սա արդեն կաթվածահար է անում, և ճիշտ չէ այս պահին խոսել «Նոր Հայաստանի» կենսունակության մասին: Իսկ Վարուժան Ավետիսյանը խոսում էր քաղաքական անբիծության մասին»:
Մանրամասները՝ տեսանյութում: