Թուրքական Son dakika լրատվական կայքի փոխանցմամբ` Սիրիայի քրդերի «Դեմոկրատական միություն» կուսակցության (PYD) համանախագահ Սալիհ Մուսլիմը հայտարարել է, որ Սիրիայի չմասնատվելու ու տարածքային ամբողջականության պահպանման միակ լուծումը դաշնությունն է.
«Առանց քրդերի դժվար է հանգել քաղաքական լուծման: Նրանք, ովքեր չեն ցանկանում դաշնություն, ցանկանում են, որ Սիրիան մնա խավարի մեջ»:
Մուսլիմը քննադատել է ՄԱԿ-ի գլխավոր քարտուղարի Սիրիայի հարցով հատուկ ներկայացուցիչ Ստաֆան դե Միստուրային, որը հայտարարել էր, որ քրդերը կազմում են Սիրիայի բնակչության 5 տոկոսը և դրա հետ մեկտեղ ցանկանում են դաշնություն:
Մուսլիմն ընդգծել է, որ Միստուրայի հայտարարությունը սխալ է և վկայում է, որ նա տեղյակ չէ քրդերի թվի մասին: Մուսլիմը հայտարարել է, որ դաշնությունից բացի, չկա որևէ այլ ելք Սիրիայի մասնատումը թույլ չտալու համար:
