Արժույթի միջազգային հիմնադրամը հուլիսի 1-ին Հայաստանին է հատկացրել հերթական վարկային տրանշը՝ 84 միլիոն դոլար: Այս որոշումը հատկապես ուշագրավ է այն ֆոնին, որ կայացվում է նախագահականում Սերժ Սարգսյանի հայտնի խորհրդակցությունից հետո: ԱՄՀ տրանշը, ըստ ամենայնի, Սերժ Սարգսյանի գործողություններից գոհ լինելու Արևմուտքի նշանն է: Իսկ գոհ լինելու պատճառը երևի թե այն է, որ Սերժ Սարգսյանը երկար լռությունից հետո վերջապես սատարեց քննադատությունների խաչաձև կրակի տակ հայտնված վարչապետ Տիգրան Սարգսյանին, որը, կարելի է ասել, արևմտյան ֆորպոստն է Հայաստանի իշխանական համակարգում, գոնե այն փրփուրը, որից այս պահին կառչում է Արևմուտքը: Թեև դատելով այն սկանդալներից, որի մեջ հայտնվում է Տիգրան Սարգսյանը՝ շարունակելով հաստատուն կերպով մնալ վարչապետ, կարող ենք ասել, որ խոսքը այնքան էլ փրփուրի մասին չէ, և գործ ունենք առնվազն համեմատաբար ավելի կարծր երևույթի հետ:
Արևմուտքը Հայաստանին հատկացնելով հերթական վարկային տրանշը՝ ըստ էության գնահատել է վարչապետին Սերժ Սարգսյանի աջակցությունը, իսկ միգուցե նաև, այսպես ասած, հովիկաբրահամյանական թևի հանդեպ նրա խիստ դիրքորոշումը: Սակայն Հովիկ Աբրահամյանը նախօրեին բավականին ուրախ էր շփվել լրագրողների հետ, բարձր տրամադրությամբ: Չի բացառվում, որ Սերժ Սարգսյանը նրան հանգստացրել է, թե նախատելու է՝ միայն Արևմուտքին ինչ-որ բան ցույց տալու համար, իսկ իրականում որևէ խնդիր Աբրահամյանի հետ չունի: Ահա և ԱԺ նախագահը վեր էր կացել ու հայտարարել, որ նախագահը ինչ որ ասում է՝ ճիշտ է ասում:
Սակայն Հայաստանի ակնկալիքն Արևմուտքից այդ 84 միլիոն դոլարը չէ՝ իհարկե: Հայաստանի կարիքների համեմատ այդ 84 միլիոնը կաթիլ է ծովում: Հայաստանին անհրաժեշտ է առնվազն մեկուկես-երկու միլիարդ դոլար, որը, սակայն, չի ստանում ոչ մի կերպ, քանի որ Արևմուտքը պարբերաբար հետաձգում է դոնորների հավաքը: Արևմուտքը գործում է իր իսկ հռչակած սխեմայի շրջանակում՝ նախ քայլեր, փոփոխություններ, հետո ֆինանսներ: Կոնկրետ օրինակով Սերժ Սարգսյանին ցույց տվեցին, որ իրենց խոսքի տերն են, և բավական է անել քայլեր, ու կստանաս ֆինանսները: Սերժ Սարգսյանի արածը փոքր քայլ էր, հետևաբար փոքր էր նաև հատկացումը: Շատ կարվի՝ կլինի շատ հատկացում՝ ակնարկում է Արևմուտքը:
Սա, իհարկե, ինչ-որ առումով նվաստացուցիչ իրավիճակ է, սակայն պետք է նկատել, որ այդպես խոսում են ոչ թե Հայաստանի, այլ Հայաստանի իշխանությունների հետ, որոնք իրենց հետ այլ կերպ խոսելու տեղ այլևս չեն թողել: Բայց այդ ամենի նստվածքը, իհարկե, մնում է Հայաստանի վրա:
Բոլոր դեպքերում պարզ է, որ հերթական անգամ իշխանություններին ցույց են տվել շաքարը, սակայն պահել են այն՝ պահանջելով ավելի լուրջ քայլեր: Իսկ քանի որ Հայաստանն այլ ֆինանսական օժանդակության հույս չունի, Սերժ Սարգսյանն, ամենայն հավանականությամբ, առաջիկայում ստիպված կլինի անել ավելի շատ կամ մեծ քայլեր՝ ավելի շատ ֆինանսական օգնություն ստանալու համար: Իսկ դա նշանակում է, որ իշխանական համակարգում առանձնապես բարձր տրամադրության հիմքեր պետք է որ չլինեն, որովհետև հայտնի չէ, թե ով և երբ կհայտնվի Սերժ Սարգսյանի թիրախում ավելի մեծ քայլի համար: Առավել ևս, որ 84 միլիոնով Արևմուտքն, ամենայն հավանականությամբ, Սերժ Սարգսյանի ախորժակն է ընդամենը բացում:
Լուսանկարը՝ PanARMENIAN Photo-ի
