Մեծ Բրիտանիայի բնակիչները, որոնք հունիսի 23-ի հանրաքվեում որոշում են ընդունել ԵՄ կազմից երկրի դուրս գալու մասին, կատարել են իրենց ընտրությունը, որը պետք է հարգել: Այս մասին ասել է ՄԱԿ-ի գլխավոր քարտուղար Պան Գի Մունը ֆրանսիական Journal du Dimanche թերթին տված հարցազրույցում:
«Ես հույս ունեի, որ ընտրությունը հօգուտ միասնության կկատարվի: Բայց մենք դարձանք Միացյալ Թագավորությունում ամենալարված բանավեճերի վկան, որոնց արդյունքներով բրիտանացիները կատարեցին իրենց ընտրությունը, և մենք պետք է հարգենք այն»,- ասել է նա:
Նրա խոսքով՝ այդ որոշումից հետո Մեծ Բրիտանիան պետք է սկսի ԵՄ կազմից դուրս գալու գործընթացը Լիսաբոնի պայմանագրի 50-րդ հոդվածի համաձայն:
Ինչպես ընդգծել է ՄԱԿ-ի գլխավոր քարտուղարը՝ ԵՄ-ն, չնայած բրիտանացիների որոշմանը, «հարուստ երկրների միություն է, որոնք առաջին հերթին առատաձեռն են ՄԱԿ-ի նկատմամբ տնտեսական զարգացման և մարդու իրավունքների պաշտպանության օգնության ոլորտում»: «Ուղերձը, որով ես դիմում եմ բոլորին, պարզ է՝ երբ մենք միասին ենք գնում, ավելի ուժեղ ենք: Հուսով եմ՝ բրիտանացիները կկարողանան հաղթահարել դժվարությունները, որոնք սպասվում են նրանց»,- նկատել է նա:
