Amnesty International իրավապաշտպան կազմակերպությունն իր 50-ամյակի կապակցությամբ հրապարակել է հաղորդագրություն, որում ասվում է, որ «ազատության և արդարության կոչերը, որոնք ավելի բարձր են հնչում ամբողջ Մերձավոր Արևելքում և Հյուսիսային Աֆրիկայում, ինչպես նաև սոցիալական մեդիաների ծաղկումը աննախադեպ հնարավորություն են մարդու իրավունքների ոլորտում փոփոխությունների համար, և աշխարհին դրանցից մեկ քայլ է բաժանում»,- ասված է Amnesty International-ի հաղորդագրության մեջ:
Կազմակերպության գլխավոր քարտուղար Սալիլ Շեթթին ասել է, որ «50 տարի հետո, ինչ իրենք սկսել են լուսաբանել բռնությունները, մարդու իրավունքների ոլորտում հեղափոխությունը կանգնած է պատմական զարգացումների առաջ»: Նա շեշտել է, որ մարդիկ այլևս հրաժարվում են վախենալուց: Հաճախ երիտասարդությունը կանգնում և բարձրաձայն հայտարարում է իր մասին՝ չնայած մարտերին, փամփուշտներին, արցունքաբեր գազին և տանկերին: «Միջազգային հանրությունը պետք է օգտվի փոփոխությունների այս հնարավորությունից և իրենից կախված ամեն ինչ անի, որպեսզի 2011 թ. ի դերև չհանի մարդու իրավունքների պաշտպանության ասպարեզում առաջ եկած հույսերը»,- ասվում է Amnesty International-ում:
Հատուկ նշվում է, որ Թունիսում և Եգիպտոսում դիկտատորների տապալումը սևեռել է ողջ աշխարհի ուշադրությունը: Հիմա դժգոհություն լսվում է ամենուր` Ադրբեջանից մինչև Զիմբաբվե: Եվ չնայած այս ամենին` խոսքի ազատությունը ճնշվում է ամենուր:
«Լիբիայի, Սիրիայի, Բահրեյնի և Եմենի իշխանություններն արդեն ցուցադրել են իրենց պատրաստակամությունը իշխանության ղեկին մնալու համար ծեծելու, խեղելու և սպանելու խաղաղ ցուցարարներին: Նույնիսկ այնտեղ, որտեղ դիկտատորները գահընկեց են արվել, ինստիտուտները, որոնց վրա նրանք հիմնված էին, դեռ վերացված չեն, և ակտիվիստները գործելու մեծ դաշտ ունեն: Ադրբեջանի, Չինաստանի և Իրանի ռեպրեսիվ իշխանությունները վաղօրոք փորձում են կանխել նմանատիպ հեղափոխություններն իրենց երկրներում»,- ասվում է Amnesty International-ի հաղորդագրության մեջ: