Երևանի ավագանու «Բարև, Երևան» խմբակցության անդամ Արթուր Գասպարյանը դիմում է ներկայացրել խմբակցության կազմից դուրս գալու մասին: Վերջինս «Ժողովրդավարական ուղի» կուսակցության հիմնադիր, վաղամեռիկ Մանուկ Գասպարյանի որդին է: Արթուր Գասպարյանը խմբակցությունից դուրս կգա, սակայն, կշարունակի մնալ որպես ավագանու անդամ: Այս մասին այսօր Երևանի ավագանու նիստին հայտարարել է քաղաքապետ տարոն Մարգարյանը:
Արթուր Գասպարյանն «Առաջին լրատվական»-ի հետ զրույցում նշեց դուրս գալու պատճառը. վերջինս մեկ տարի շարունակ խմբակցության անդամներին զգուշացրել է, որ խմբակցութան ղեկավար Գագիկ Բաղդասարյանը քաղաքական գործունեությանը զուգահեռ զբաղվում է գործարարությամբ, ինչը նշանակում է, որ «Բարև, Երևան» խմբակցությունը որևէ կերպ չի տարբերվում մյուս խմբակցություններից: «Համաձայն էի, որ յուրաքանչյուր անդամ լիներ խմբակցության ղեկավար, բացի նրանից»,-հավելեց Արթուր Գասպարյանը:
Ավագանու անդամներ Անահիտ Բախշյանը և Դավիթ Սանասարյանն «Առաջին լրատվական»-ի հետ զրույցում ասացին, որ Արթուր Գասպարյանի՝ խմբակցությունից դուրս գալու որոշումն անակնկալ էր խմբակցության անդամների համար:
Արթուր Գասպարյանը մեզ հետ զրույցում հավելեց, որ թեև դուրս է գալիս խմբակցությունից, սակայն շարունակելու է համագործակցել «Ժառանգություն» կուսակցության հետ:
