Այսօր Կառավարության շենքի դիմաց արդեն ավանդական բողոքի ակցիային միացել էր նախկին բուժքույր Նինել Իվանյանը:
Նա 1997 թվականից մինչև 2005 թվականը աշխատել է «Արմենիա» հանրապետական հիվանդանոցում՝ որպես բուժքույր: Իր խոսքերով՝ աշխատանքի ընթացքում ամեն ինչ կատարել է պատշաճ կերպով, բայց երբ հետաքրքրվել է, թե ինչու են իրեն վճարում 15.000 դրամ, մյուսներին՝ 25.000, նրան աշխատանքից ազատել են: Նա նախկինում պահանջել է իր 15.000 դրամը, սակայն իր խոսքերով՝ դա նույնպես չեն տվել: Բուժքույրը դիմել է դատարան, սակայն դատական գործ չեն հարուցել, իսկ իրեն հիվանդանոցի տնօրեն Գրիգոր Գրիգորյանը բնութագրել է որպես հոգեկան հիվանդ:
Մեր զրուցակցից հետաքրքրվեցինք, թե ինչու մնացած բուժքույրերն էլ չեն միանում ակցիային, ինչին ի պատասխան՝ նա ասաց, որ վախենում են: Նրա խոսքով՝ իր գլխին փորձել են «սարքել», դիտավորյալ անջատել են իր հիվանդների շնչառական ապարատները, որպեսզի իր վրա բարդեն, սակայն իր աշխատելու ընթացքում ոչ մի մահ չի գրանցվել:
Նա պահանջում է բարոյական և նյութական վնասի փոխհատուցում և իր աշխատանքային գրքույկը:
