Եգիպտոսի իշխանությունները հունիսի 26-ին բետոնե բլոկներով փակել են Կահիրեի նախագահական «Իտիհադիա» պալատի բոլոր մուտքերը: Այս մասին գրում է «Ալ-Յոում Ալ-Մասրի» թերթը: Բացի այդ, փողոցի երկայնքով տեղադրվել են մետաղական ցանկապատեր, որոնց վերևում փշալարեր են ամրացված:
Պալատի ներսում և հարակից տարածքում տեղակայվել են եգիպտական ազգային գվարդիայի ստորաբաժանումներ, որոնց տրվել է օբյեկտը պահպանելու հրաման: Գվարդիականները զինված են հրազենով, պալատի դարպասների մոտ կանգնած են տանկեր ու զրահամեքենաներ:
Ոստիկանությունում և գվարդիայում կասեցվել են բոլոր հեռացումներն ու արձակուրդները: Այդպես են իշխանությունները պատրաստվում ընդդիմության հանրահավաքին, որը կկայանա հունիսի 30-ին: Ցուցարարներն իրենց բողոքը կարտահայտեն Մուհամմադ Մուրսիի քաղաքականության դեմ:
Հանրահավաքին պատրաստվում է նաև Կահիրեում ԱՄՆ դեսպանատունը: Դիվանագիտական առաքելությունը կոչ է արել իր քաղաքացիներին սննդի, ջրի ու անհրաժեշտ այլ ապրանքների պաշար ունենալ, որպեսզի այդ օրը փողոց դուրս գալու անհրաժեշտություն չլինի:
Բժշկական ծառայությունները նույնպես պատրաստվում են այս օրվան:
Ակցիան նվիրված կլինի Մուհամմադ Մուրսիի երդմնակալության 1 տարվան:
