Կոտայքի մարզի ընդհանուր իրավասության դատարանում (ք.Աբովյան) հունիսի 27-ին` ժամը 10:30, տեղի կունենա Մարո Գուլոյանի կասկածելի ինքնասպանության գործով դատական նիստ:
Դատարանը պետք է քննարկի քրեական գործով վարույթը կարճելու որոշման դեմ բերված բողոքը: Բողոքում բարձրացված հարցը, սակայն, իր լուծումը գտել է մինչև դատաքննությունը:
Երեկ ՀՀ Գլխավոր դատախազությունից տուժող կողմին տեղեկացրել են, որ Մարո Գուլոյանի իրավահաջորդի ներկայացուցչի և Ընդդեմ կանանց նկատմամբ բռնության կոալիցիայի կողմից հունիսի 17-ին ներկայացված բողոքն ուսումնասիրվել է, և Գլխավոր դատախազի որոշմամբ կարճման որոշումը վերացվել է:
Այսպիսով, Մարո Գուլոյանի քրեական գործի վարույթը վերաբացվելու է:
Ընդդեմ կանանց նկատմամբ բռնության կոալիցիան շատ հուսադրող է համարում այն փաստը, որ գոնե այս անգամ ՀՀ Գլխավոր դատախազությունը չանտեսեց տուժող կողմի բողոքը և չմերժեց նրա օրինական պահանջը:
Այսքանով, սակայն, գործով օբյեկտիվ քննություն իրականացնելու երաշխիքներ դեռ չեն ստեղծվել, քանզի դրա համար անհրաժեշտ է Մարո Գուլոյանի գործով նախաքննությունը տեղափոխել Երևան:
Տուժող կողմը և Ընդդեմ կանանց նկատմամբ բռնության կոալիցիան շարունակելու են իրենց համատեղ պայքարն այս ուղղությամբ:
