«Առաջին լրատվական»-ի տեղեկություններով` Հայաստանի երկրորդ նախագահ Ռոբերտ Քոչարյանի գրասենյակը վերջերս որոշել է համագործակցել ամերիկյան լոբբիստական Aristotle խմբի հետ: Կազմակերպությունը հիմնականում զբաղվում է օտարերկրյա քաղաքական գործիչների օգտին ամերիկյան պետական և քաղաքական շրջանակներում լոբբիստական աշխատանքով: Կազմակերպության հետ աշխատանքները համակարգելու է Հայաստանում ԱՄՆ նախկին դեսպան Ջոն Էվանսը:
Առաջիկայում Ջ. Էվանսը հավանաբար հանդիպումներ կունենա ամերիկահայ լոբբիստական և քաղաքական կազմակերպությունների հետ՝ նրանց հետ իր առաքելությանն օժանդակելու հնարավոր ուղիները քննարկելու նպատակով: ԱՄՆ նախկին դիվանագետը հույս ունի համագործակցել առավելապես ԱՄՆ-ի Հայ դատի և Հայկական համագումարի հետ:
Ի դեպ, հայաստանյան քաղաքական շրջանակներն առաջին անգամ չէ, որ առնչվում են Aristotle-ի հետ: «Առաջին լրատվական»-ը տեղեկացրել էր, որ 2012 թ․ ԲՀԿ առաջնորդ Գագիկ Ծառուկյանն ամերիկյան այս լոբբիստական խմբի ներկայացուցիչներին հրավիրել էր Հայաստան՝ կուսակցության քարոզչական աշխատանքները կազմակերպելու համար: Մի քանի շաբաթ Հայաստանում մնալուց հետո կազմակերպության ներկայացուցիչները մեկնել էին Հայաստանից՝ հայտնելով, որ որևէ ձևով չեն կարող օգտակար լինել կուսակցության իմիջի բարձրացմանը:
Հիշեցնենք, որ Ջ. Էվանսը ետ կանչվեց դիվանագիտական առաքելությունից այն պատճառով, որ 2005 թ. համարձակվել էր հայտարարել, որ 1915 թ. տեղի է ունեցել Հայոց ցեղասպանություն: Այդ հայտարարությունը հակասում է ԱՄՆ իշխանությունների տեսակետին, և այդ պատճառով Ջ. Էվանսը ոչ միայն ետ կանչվեց, այլ զրկվեց դիվանագիտական գործունեություն ունենալու հետագա հնարավորությունից: Վերջինս ՀՀ-ում դեսպան է եղել ընդամենը 2 տարի և մեր երկրում ԱՄՆ-ի ամենակարճ դեսպաններից մեկն է եղել: Եվ ահա, նա որոշել է Ռ. Քոչարյանի համար լոբբիստական գործունեություն իրականացնել ԱՄՆ-ում:
