Եվրոպայի խորհրդի Խորհրդարանական վեհաժողովի ամառային նստաշրջանի առաջին օրը՝ հունիսի 24-ին, ԵԽ Նախարարների կոմիտեում Հայաստանի նախագահության շրջանակներում, ուղերձով հանդես կգա ՀՀ արտգործնախարար Էդվարդ Նալբանդյանը: Նա կպատասխանի նաև ԵԽԽՎ պատվիրակների հարցերին:
Հունիսի 24-ից 28-ը կայանալիք լիագումար նիստերի օրակարգում Հայաստանին անմիջականորեն վերաբերող հարցի քննարկում նախատեսված չէ: Սակայն, ինչպես «Փաստինֆո»– ի հետ հարցազրույցում նշել է ԵԽԽՎ-ում հայկական պատվիրակության ղեկավար Դավիթ Հարությունյանը, «եվրոպական բոլոր հարցերը Հայաստանին վերաբերում են»:
Ըստ Դ.Հարությունյանի՝ նստաշրջանում քննարկվելիք զեկույցներից որոշներում Հայաստանը, ի թիվս ԵԽ անդամ այլ երկրների, հիշատակվում է:
Հայկական պատվիրակության ղեկավարը հայտնել է նաև, որ նստաշրջանի օրերին նախատեսվում է հայկական և ադրբեջանական պատվիրակությունների հանդիպումը: Նման նախաձեռնությամբ հանդես է եկել ԵԽԽՎ նախագահը, և, ըստ Դ.Հարությունյանի, հայկական կողմն ընդունել է հրավերը: Ի դեպ՝ հայկական պատվիրակությունն այս նստաշրջանին կմասնակցի ամբողջ կազմով:
Նախատեսվում է նաև, որ Մոնիտորինգի հանձնաժողովը կնշանակի Հայաստանի հարցով նոր համազեկուցողի: Նա կփոխարինի Ջոն Պրեսկոտին՝ համազեկուցողի լիազորությունների ժամկետը լրանալու կապակցությամբ: Ըստ հայկական պատվիրակության ղեկավարի, թեկնածուներ կան, սակայն որոշումը պետք է կայացնի հանձնաժողովը՝ քվեարկությամբ:
Ինչ վերաբերում է «Հայաստանի նախագահությունը Նախարարների կոմիտեում» վերտառությամբ ԵԽԽՎ կայքէջում տեղադրված փաստաթղթին, որտեղ մեր երկրի հասցեին, մեղմ ասած, ոչ հաճելի արտահայտություններ կան՝ «ագրեսոր պետություն» և այլն, ապա. «Այդ պատգամավորները հայտնի են իրենց ադրբեջանամետ պահվածքով: Որևէ մեկի մոտ դա հարց չի առաջացնում, և, թերևս այդ պատճառով է, որ անգամ քարտուղարությունն առաջարկում է, որպեսզի Բյուրոն այս փաստաթղթին որևէ ուշադրություն չդարձնի, համարելով, որ այն որևէ հետագա քայլ չի պահանջում»:
Դ.Հարությունյանի պարզաբանմամբ՝ փաստաթուղթը ստորագրած Միացյալ Թագավորության, Իսպանիայի, Իտալիայի, Ֆինլանդիայի, Բելգիայի, Բուլղարիայի, Իռլանդիայի և Լեհաստանի շուրջ երեք տասնյակ ԵԽԽՎ պատվիրակների կողմից եղել է առաջարկություն, որպեսզի հարցը դառնա քննարկման առարկա, ուղարկվի հանձնաժողով, հետագայում պատրաստվի զեկույց և այլն: Սակայն դրան ընթացք չի տրվելու, ինչից հետևում է, որ այն ունենալու է «մաքուր թղթի» կարգավիճակ:
«Տհաճություն պետք չէ ապրել: Եթե կան մարդիկ, որոնք բացարձակապես ծախված են, և հայտարարություն են անում, որը պայմանավորված է իրենց ծախված լինելով, դրան պետք է հանգիստ վերաբերվել»,-վստահեցրել է հայկական պատվիրակության ղեկավարը՝ հավելելով, որ «այդ ցանկն ուղղակի բացահայտում է, թե ովքեր են իրենց հենարանը»:
Հարցին, թե արդյո՞ք այդ պատվիրակներն ադրբեջանական լոբբիի անդամներ են, Դ.Հարությունյանն ասել է. «Լոբբին ավելի մեծ է. կան մարդիկ, որոնք շատ ավելի ակտիվ են, կան մարդիկ, որոնք վարձատրվող են, և կան մարդիկ, որոնք գործում են ոչ պաշտոնական վարձատրության դիմաց»:
