Ասոցացման համաձայնագրում, որը Կիևը հույս ունի նոյեմբերին Վիլնյուսում կայանալիք «Արևելյան գործընկերության» գագաթնաժողովում ստորագրել Եվրամիության հետ, չի նախանշվում Ուկրաինայի և Եվրամիության հարաբերությունների զարգացումը: Ինչպես հաղորդում է RIA Novosti-ն, այս մասին ասվում է համաձայնագրի հրապարակված աշխատանքային նախագծում:
«Քաղաքական ասոցացումը և ԵՄ-ին Ուկրաինայի ինտեգրումը կախված է համաձայնագրի կատարման առաջընթացից, ինչպես նաև ընդհանուր արժեքների ապահովման գործում Ուկրաինայի ձեռքբերումներից և ԵՄ-ի ճանապարհին քաղաքական, տնտեսական և իրավական ոլորտների առաջընթացից»,- ասվում է փաստաթղթի նախագծում:
Համաձայնագրում նաև նշվում է, որ Ուկրաինային անհրաժեշտ է իրականացնել քաղաքական, սոցիալ-տնտեսական, իրավական բարեփոխումներ` համաձայնագրի արդյունավետ կատարման համար:
Համաձայնագրում ասվում է, որ կողմերն ընդունում են առանց մուտքի արտոնագրի ռեժիմ սահմանելու կարևորությունն ուկրաինացիների համար: Փաստաթուղթը նախատեսում է Ուկրաինայի օրենսդրության մոնիթորինգ` ԵՄ չափորոշիչների համաձայն: