Հունիսի 13-ին դերասանուհի Անջելինա Ջոլիի դուբլյոր և ընկերուհի Յունիս Հաթհարթը Կալիֆոռնիայի դատարան հայց էր ներկայացրել մեդիամագնատ Ռուպերտ Մերդոկի և նրա ընկերության դեմ` վերջիններիս մեղադրելով իր հեռախոսը գաղտնալսելու մեջ: Ինչպես հաղորդում է spletnik-ը, այդ գաղտնալսումների շնորհիվ պարզ են դարձել Անջելինա Ջոլիի և Բրեդ Փիթի սիրավեպի մանրամասները:
Դատական գործը վերաբերում է այն ժամանակահատվածին, երբ Յունիսը բնակվել ու աշխատել է Լոս Անջելեսում և երբեմն փոխարինել է Ջոլիին «Միստեր և միսիս Սմիթ» ֆիլմի նկարահանումներում:
Համարվում է, որ Անջելինա Ջոլիի և Բրեդ Փիթի սիրավեպը սկսվել է հենց այս ֆիլմի ստեղծման ժամանակ, երբ Բրեդ Փիթն ամուսնացած էր Ջենիֆեր Էնիսթոնի հետ:
Հայցի համաձայն` Անջելինան և Բրեդը 2005 թ. ֆիլմի նկարահանումների ժամանակ բնակվել են հյուրանոցային մեկ համարում: Այս մասին ակնարկներ է գրում The Sun պարբերականը: Յունիսը ենթադրում է, որ թերթն այդ տեղեկատվությունը ստացել է իր հեռախոսի ձայնային փոստը կոտրելու հետևանքով:
2005 թ. տաբլոիդներում հայտնված ևս մեկ տեղեկատվություն ստացվել է նույն ձևով: Անջելինան դիմել է Յունիս Հաթհարթին` խնդրելով իրեն մոտոցիկլետ վարել սովորեցնել, քանի որ նա ցանկացել է զբոսնել Բրեդի հետ: Հաթհարթը իր ընկերներից մեկին խնդրել է օգնել Ջոլիին: Դասընթացներն անցկացվել են մասնավոր ագարակում, սակայն մամուլը կրկին իմացել է այդ մասին:
Բացի այդ, Յունիսը պնդում է, որ լրագրողները ջնջել են իր ձայնային հաղորդագրությունների մի մասը նախքան ինքը կհասցներ դրանք լսել:
