Վրաստանի պաշտպանության նախարար Իրակլի Ալասանիան օգոստոսի 19-ին պաշտոնական այց կկատարի ԱՄՆ: Այս մասին լրագրողներին հայտնել է նախարարն անձամբ՝ փոխանցում է Trend գործակալությունը:
Դա կլինի վերջին 4 տարիներին Վրաստանի պաշտպանության նախարարի առաջին պաշտոնական այցը ԱՄՆ:
Ինչպես հայտնել է Ալասանիան, ինքն ԱՄՆ այցի հրավեր է ստացել իր ամերիկացի գործընկերրոջից Բրյուսելում հանդիպման ժամանակ, երբ Ալասանիան մասնակցում էր ՆԱՏՕ-ի նախարարական գագաթնաժողովին:
Նրա խոսքով՝ ամերիկյան կողմը հաստատել է ռազմական ոլորտում համագործակցության խորացման պատրաստակամությունը:
«ԱՄՆ-ը Վրաստանին կօգնի Զինված ուժերի պատրաստման հարցում, և ոչ միայն արտերկրում օպերացիաների անցկացման, այլև Վրաստանի պաշտպանունակության ուժեղացման համար»,- ասել է Ալասանիան:
Նախարարը գոհունակություն է հայտնել ռազմական ոլորտում ԱՄՆ-ի և Վրաստանի միջև հարաբերությունների ներկայիս վիճակից:
