Սիրիայի հեղափոխական և ընդդիմադիր ուժերի ազգային կոալիցիան իսլամական աշխարհին կոչ է արել սիրիացի ապստամբներին զինելու որոշիչ գործողություններ ձեռնարկել: Ըննդիմության ուժերն աջակցել են նաև Եգիպտոսի նախագահ Մուհամմադ Մուրսիի՝ արաբա-մուսուլմանական գագաթնաժողով գումարելու կոչին, հաղորդում է RIA Novosti-ն:
«Հույս ունենք, որ մոտակա ժամանակներս նման հանդիպում տեղի կունենա, և դրա արդյունքներով որոշումներ կկայացվեն և դրան կհետևեն Սիրիական ազատ բանակին զինելու գործնական քայլեր»,- ասվում է ընդդիմության հայտարարության մեջ:
Փաստաթղթում ընդգծվում է, որ սիրիացի ապստամբները դիմակայում են ոչ միայն կառավարական ուժերին, այլ նաև «իրանական ագրեսիա»-ին:
Հիշեցնենք, որ նախորդ շաբաթ Եգիպտոսի նախագահ Մուհամմադ Մուրսին հայտարարել էր Սիրիայի կառավարության հետ դիվանագիտական հարաբերությունները խզելու մասին և կոչ էր արել որքան հնարավոր է շուտ գումարել արաբա-մուսուլմանական գագաթնաժողով՝ «սիրիացի ժողովրդին փրկելու համար»:
