«Առաջին լրատվական»-ի տեղեկություններով՝ «Բարգավաճ Հայաստան» կուսակցությունում դժգոհություն կա ԱԺ նախագահ Հովիկ Աբրահամյանի նկատմամբ: Խոսքը, մասնավորապես, վերաբերում է անցած շաբաթ Վերահսկիչ պալատի նախագահ Իշխան Զաքարյանի ներկայացրած հաշվետվության առնչությամբ Հովիկ Աբրահամյանի ունեցած ելույթին:
Հիշեցնենք, որ ՎՊ նախագահ Իշխան Զաքարյանի ելույթից հետո ելույթ ունեցավ ԱԺ նախագահ Հովիկ Աբրահամյանը: «Պարոն Զաքարյան, չե՞ք կարծում, որ հանրության մեջ տպավորություն կստեղծվի, որ եթե մենք այդ թերություններն ու յուրացումները հայտնաբերում ենք և ոչ մի պատիժ չենք կիրառում, ոնց որ` մենք էլ ենք մասնակից: Նույն բանը ես Ձեզ մի անգամ ասել եմ. եթե Դուք գալիս եք, այս ամբիոնից հնչեցնում եք այդ թերությունը, պետք է շարունակական գործընթացը լինի, պետք է մարդկանցից ազատվել, անփոխարինելի պաշտոնյա կա՞: Ես զարմացած եմ ուղղակի, կառավարության ղեկավարը` վարչապետը, պետք է լուրջ քայլեր անի այս ուղղությամբ: Ինչի՞ մասին է խոսքը»,- հայտարարել էր ԱԺ նախագահը:
Հիշեցնենք, որ Իշխան Զաքարյանը ներկայացնում էր, որ համատարած չարաշահումներ և խախտումներ կան հատկապես գնումների և շինարարության ոլորտներում։ Քանի որ նախորդ տարիներին քաղաքաշինության նախարար է եղել ԲՀԿ անդամ Վարդան Վարդանյանը, այդ խախտումները վերաբերում են նրա պաշտոնավարման շրջանին: ՎՊ-ն ստուգել է նախորդ տարիներին տեղի ունեցած շինարարության ծրագրերը: Եվ ԲՀԿ-ում գտնում են, որ Հովիկ Աբրահամյանն այդ ելույթով ոչ միայն ցանկացել է կառավարությանը քննադատել, այլ (միգուցե ոչ գիտակցաբար)` նաև ԲՀԿ-ին: Սովորաբար Հ. Աբրահամյանn իր ելույթներում կամ գործունեության մեջ այդ կուսակցության անդամներին չի անդրադառնում: Հայտնի է, որ նա ԲՀԿ ղեկավար Գագիկ Ծառուկյանի խնամին է և ԲՀԿ-ում համարվում է ԲՀԿ-ամետ գործիչ: Այս է պատճառը որ Վերահսկիչ պալատի հաշվետվության ներկայացման ժամանակ նրա արած այդ հայտարարությունը դժգոհություն է առաջացրել ԲՀԿ-ում:
Լուսանկարը՝ PanARMENIAN Photo-ի
