Սուպերմենի մասին նոր ֆիլմը՝ «Պողպատե մարդը», անցած հանգստյան օրերի տվյալներով՝ գլխավորում է ԱՄՆ-ի ու Կանադայի կինովարձույթը: Ինչպես հաղորդվում է Boxoffice.com կայքում, ֆիլմը առաջին հանգստյան օրերին վաստակել է 113 մլն դոլար:
Զակ Սնայդերի ֆիլմի միջազգային պրեմիերան տեղի է ունեցել հունիսի 14-ին: Սուպերմեն Քլարկ Քենթին՝ ֆիլմի գլխավոր հերոսին, մարմնավորում է Հենրի Քևիլը («Աստղային փոշի», «Թյուդորները» սերիալ):
Ֆիլմի շնորհանդեսից առաջ Warner Bros. ընկերությունը հայտարարել էր «Պողպատե մարդու» շարունակությունը նկարահանելու մտադրության մասին:
Երկրորդ հորիզոնականում է «Աշխարհի վերջը» կատակերգությունը (This Is the End)՝ 20.5 մլն դոլարով:
Երրորդ տեղում է «Խաբեության պատրանք» ֆիլմը (Now You See Me)՝ հանգստյան օրերին վաստակած 10.3 մլն դոլարով:
«Ֆորսաժ» ֆրանշիզի 6-րդ ֆիլմը (Fast & Furious 6), որը մայիսին 2 շաբաթվա ընթացքում գլխավորել է վարձույթը, երկրորդ հորիզոնականից իջել է 4-րդ հորիզոնական՝ 9.4 մլն դոլարով:
