Ուզբեկստանի բռնապետ Իսլամ Քարիմովի դուստր Գյուլնարա Քարիմովան, որը դիզայներ է և փոփ երգչուհի, շվեդական TeliaSonera և ուզբեկական Takilant հեռուստաընկերության միջև առաջացած կոռուպցիոն գործով գլխավոր կասկածյալներից մեկն է:
Ինչպես հաղորդում է շվեդական Aftonbladet տապլոիդը, հետաքննությամբ պարզվել է, որ 40-ամյա Գյուլնարան գործի կենտրոնական անձ է: Ուզբեկական Takilant-ի սեփականատերն է Գայանե Ավագյանը, որը Քարիմովայի մոտ ընկերուհին ու գործընկերն է: Ըստ տեղեկությունների՝ շվեդական հեռուստաընկերությունը 2.2 միլիարդ շվեդական կրոնի կաշառք է տվել ուզբեկական կողմին: Քարիմովան հերքում է իր մասնակցությունն այդ պատմությանը:
Վերջերս հայտնի է դարձել, որ բռնապետի դուստրը 2012-ի օգոստոսին կաշառքի վերաբերյալ գաղտնի խոսակցություններ է ունեցել: Համաձայն պայմանավորվածության՝ TeliaSonera-ն պետք է հովանավորեր Ուզբեկստանում հույն երգիչ Դեմիս Ռուսոսի համերգը:
Գործից այլ մանրամասներ չեն հաղորդվում:
Նշվում է, որ Ուզբեկստանի նախագահի ավագ դուստրը Wikileaks-ի հրապարակած ԱՄՆ դիվանագիտական գաղտնի փաստաթղթերից մեկում Ուզբեկստանում ԱՄՆ նախկին դեսպան Ջոն Փերնելի կողմից համարվում է «Ուզբեկստանի ամենաատելի մարդ»: Foreign Policy ամսագիրն էլ նրան անվանել է քաղաքական առաջնորդների 5 ամենավատ դուստրերից մեկը:
Նա վերահսկում է երկրի թեյի արտադրության մեծ մասը, Bunyodkor ֆուտբոլային ակումբը: Գյուլնարան նաև ՄԱԿ-ում Ուզբեկստանի մշտական դեսպանն է:
