Ֆրանսիայում սկսված ավիադիսպետչերների գործադուլը հունիսի 12-ին տարածվել է 11 երկրներում՝ հաղորդում է RTE News-ը:
Օդանավակայանի աշխատակիցները բողոքում են «միասնական եվրոպական երկնքի» համակարգ ստեղծելու Եվրամիության ծրագրերի դեմ: Արհմիությունները մտավախություն ունեն, որ այն կարող է հանգեցնել աշխատատեղերի կամ աշխատավարձերի կրճատման:
Ֆրանսիայում գործադուլը սկսվել է նախօրեին: Ֆրանսիական արհմիությունները միասնական երկնքի մասին օրենք ընդունելու փորձն անվանում են ուղիղ հարձակում տվյալ ոլորտի վրա: Գործադուլի պատճառով Ֆրանսիայում արդեն չեղյալ է հայտարարվել շուրջ 180 չվերթ:
Ֆրանսիայի տրանսպորտի նախարար Ֆրեդերիկ Կյուվիլյեն հայտարարել է, որ ինքը գերմանացի իր գործընկերոջ հետ դիմել է Եվրահանձնաժողով՝ խնդրելով սառեցնել նախագիծը:
Բրյուսելում պնդում են, որ եվրոպական ավիափոխադրումների համակարգի ֆրագմենտավորման պատճառով ավիաընկերությունները տարեկան կորցնում են շուրջ 5 միլիարդ եվրո:
