Մայիսի 6-ին Երևանի Հերացու անվան պետական բժշկական համալսարանում մեծարման և խրախուսման արարողություն էր։ Պարգևատրվել են ապրիլին ղարաբաղա-ադրբեջանական սահմանագծում տեղի ունեցած իրադարձությունների ժամանակ մասնագիտական պարտքը կատարած բժիշկներ, Հայրենական մեծ պատերազմի բժիշկ-վետերաններ, ինչպես նաև մարտական գործողությունների ժամանակ խիզախությամբ աչքի ընկած զինծառայողներ։ Միջոցառումը կազմակերպել էին ՀՀԿ Երիտասարդական կազմակերպությունը և «Առողջապահության կազմակերպիչների միավորում» ՀԿ-ն։
Պարգևատրվողների շարքում է Արցախում ապրիլի 2-ին վիրավորված հերոս զինծառայող Արման Ավետիսյանը։ Նա ոտքերից մեկի թաթը կորցնելուց հետո շարունակել է պայքարել հայրենիքի սահմանները անսասան պահելու համար: Ինչպես պատմում է հերոսը՝ վիրավորվելուց հետո զենքերը լիցքավորում էր, տալիս մարտընկերներին. կորցրած ոտնաթաթի մասին մտածելու ժամանակ չկար: Նրա խոսքով՝ իրեն ամենից շատ ցավ է պատճառում այն, որ ապրիլյան մարտերի ժամանակ կորցրել է ընկերներին։
Թալիշում նռնակի պայթյունից վիրավորված Շանթ Ղազարյանը ևս վիրավորվելուց հետո չի լքել մարտադաշտը։
Զինծառայողները նաև պատմեցին, որ ադրբեջանական բանակում այս օրերին ավելացել են վարձկանները։
Արման Ավետիսյանը մանրամասնում է՝ սահմանում կանգնած զինվորը ոգևորված է հայ ժողովրդի համախմբումից, ինչը մարտական ոգին բարձրացնող էական գործոններից մեկն է։
