ՀՀ կառավարությունը դրական եզրակացություն է տվել «Ժառանգություն» խմբակցության պատգամավոր Զարուհի Փոստանջյանի և ՀԱԿ խմբակցության պատգամավոր Հրանտ Բագրատյանի հեղինակած՝ ԼՂՀ անկախության ճանաչման վերաբերյալ օրինագծին:
ԱԺ արտաքին հարաբերությունների մշտական հանձնաժողովի նախագահ Արտակ Զաքարյանի խոսքով՝ Կառավարության եզրակացությունը հստակ ուղերձ է թե՛ Բաքվին, թե՛ ԵԱՀԿ Մինսկի խմբին և թե՛ ՀՀ քաղաքացիներին, որ մենք Արցախի անկախության ճանաչման վերաբերյալ ունենք մեր պատկերացումները:
«Պետք է լինեն հասցեական հայտարարություններ, ի վերջո հստակ է, թե որ կողմն է խախտում հրադադարի ռեժիմը, շարունակաբար ձախողում բանակցությունները, հեռանում խաղաղ կարգավորման գործընթացից: Մենք հանձնառու ենք, կողմնակից ենք և խիստ շահագրգիռ ենք խաղաղ կարգավորման մեջ,- «Առաջին լրատվականի հետ զրույցում ասաց Արտակ Զաքարյանը՝ հավելելով, որ հայկական կողմը ամեն կերպ պատրաստ է շարունակել խաղաղ բանակցությունները, բայց դրա համար պետք է լինեն համապատասխան բանակցային պայմաններ, բանակցային միավայր, չի կարելի պատերազմել և բանակցել զուգահեռաբար, չի կարելի անտեսել բոլոր այն գործոնները, որոնք որ զսպող և արգելող գործողություններ կլինեն Ադրբեջանի ագրեսիայն»:
Անկախ այն հանգամանքից, որ Մինսկի խումբը հասցեական հայտարարություններով հանդես չի գալիս, Ա. Զաքարյանի համոզմամբ, Մինսկի խմբի ձևաչափը այսօր էլ միակն է բանակցությունների ճանապարհով խնդրի խաղաղ կարգավորման համար:
«Մեր նպատակն այն է, որ ոչ թե միայն Հայաստանի Հանրապետությունը ճանաչի Արցախի անկախությունը, այլ այն, որ Լեռնային Ղարաբաղը ստանա միջազգային ճանաչում և ԼՂ ժողովրդի ինքնորոշման իրավունքը լիարժեք իրացվի»,- նշեց Ա. Զաքարյանը»:
Մանրամասները՝ տեսանյութում:
