Քիմիական երբեմնի հսկա «Նաիրիտ» քիմիական գործարանն արդեն մի քանի տարի է՝ պարապուրդի է մատնված։ Գործարանի անորոշ կարգավիճակի արդյունքում ամիսներ շարունակ աշխատավարձ չէին ստանում գործարանի աշխատակիցները, ինչը նրանց մղում էր բողոքի ակցիաների ինչպես ՀՀ կառավարության շենքի, այնպես էլ ՀՀ նախագահի նստավայրի մոտ: Շարունակական բողոքի ակցիաների արդյունքում այս տարվա ընթացքում նաիրիտցիները 45 օրը մեկ 1 ամսվա աշխատավարձ են ստանում, թեև գործարանն աշխատակիցներին պարտք է դեռևս շուրջ 10 ամսվա աշխատավարձ:
«Առաջին լրատվական»-ի հետ զրույցում «Նաիրիտ» գործարանի արհկոմի նախագահ Հրաչյա Թադևոսյանն ասաց, որ գործարանի աշխատակիցները դեռևս որոշակի ակնկալիքներ ունեն:
Ըստ նրա՝ այս պահին գործարանի աշխատակիցներն ակնկալում են, որ գործարանը կվերագործարկվի և կմարի բոլոր պարտքերը: «Այս տարի ամենաուշը 45 օրը մեկ աշխատավարձ ենք ստացել: Սա, նախկինի համեմատ, երբ ամիսներով աշխատավարձ չէինք ստանում, լավ համարելը հարաբերական է: Ավելի լավ ժամանակը կլինի այն ժամանակ, երբ ամեն ամիս աշխատավարձ կստանանք: Մեզ ասում են, որ բանակցություններ են գնում նոր սեփականատիրոջ հետ, ինչից հետո շատ բան պարզ կդառնա»,- ասաց Հրաչյա Թադևոսյանը:
Նրա խոսքով՝ 40 օրը մեկ աշխատավարձ ստանալու դեպքում գոնե ժամանակավորապես կդադարեն բողոքի ակցիաները՝ մինչև գործարանի կարգավիճակի հստակեցումը:
Լուսանկարը՝ PanARMENIAN Photo-ի
