Չինաստանի հյուսիսարևմտյան Սինցզյան-Ույղուրի ինքնավար շրջանում ջրհեղեղի պատճառ դարձած տեղատարափ անձրևներից 98 717 մարդ է տուժել: Այս մասին հայտնում է «Սինհուա» գործակալությունը: Անձրևները չեն դադարում երեքշաբթի օրվանից: Տարերային աղետից մեծապես տուժել են Ակսու և Տաչեն քաղաքները:
Ջրհեղեղի հետևանքով վնասվել և ավերվել են ավելի քան 300 բնակելի շինություններ, վիթխարի վնաս է հասցվել գյուղատնտեսական մշակաբույսերին: Ջրհեղեղի հասցրած տնտեսական վնասը գնահատվում է 17 մլն դոլար:
Հորդառատ անձրևներ են նաև Չինաստանի արևելյան և հարավային մարզերում: Այդ տարածաշրջաններում վերջին երկու օրերին տուժել է 4.68 մլն բնակիչ, զոհվել՝ 15-ը:
