Յուրաքանչյուր մեղավոր պետք է օրենքի խստությամբ պատժվի: Այս մասին ՀՀԿ ԳՄ նիստից հետո լրագրողների հետ զրույցում ասաց ՀՀԿ մամլո խոսնակ, ԱԺ փոխնախագահ Էդուարդ Շարմազանովը՝ անդրադառնալով Գորիսի ողբերգական իրադարձություններին։
«Քննարկել ենք Գորիսի դեպքերը, նախկին մարզպետի հրաժարականը, կոնկրետ ես ներկայացրել եմ տեսակետ, այն է՝ որ խնդիրը գտնվում է նախաքննության փուլում, անկախ պաշտոնից՝ յուրաքանչյուր մեղավոր պետք է օրենքի խստությամբ պատժվի։ Կառավարությունն ընդունել է հրաժարականը, հանրապետության նախագահն էլ հաստատել, որևէ այլ նշանակաման հարց չենք քննարկել»,-ասաց Շարմազանովը՝ հավելելով, որ նոր մարզպետի անուն իրենք ՀՀԿ ԳՄ նիստի ընթացքում չեն քննարկել: ՀՀ խոսնակի կարծիքով՝ Հայաստանում կան անբարեխիղճ պաշտոնյաներ, բայց ինքը դեմ է, որ ծայրահեղական գնահատականներ հնչեցվեն. «Գորիսում եղել է շատ ցավալի դեպք, բայց ես խնդրում եմ, որ որևէ մեկը իրավապահ համակարգի պարտավորություն չվերցնի»:
Անդրադառնալով արտաքին քաղաքականության խնդիրներին՝ Շարմազանովն ասաց, որ իրենք ոչ թե գնում են «կամ-կամ», այլ «և-և» սկզբունքով. «Մնեք փորձում ենք գնալ և՛ Եվրասիական միության, և՛ Եվրամիության ուղղությամբ։ Մենք և՛ մեր ռազմավարական գործընկերոջ՝ Ռուսաստանի հետ ենք հարաբերությունները լավացնում, և՛ մեր եվրոպացի գործընկերների»:
