ՀՀ կառավարությունը հաստատեց «Տարրական դասարանների աշակերտներին անվճար դասագրքերով և ուսումնական գրականությամբ ապահովում ու ավագ դպրոցների դասագրքերի հրատարակում», «Ռազմագիտության կաբինետների վերականգնում» և «Կրթության առանձնահատուկ պայմանների կարիք ունեցող երեխաների կրթության կազմակերպման համար նախատեսված ծրագրերի, ձեռնարկների, ուսումնական այլ նյութերի մշակում, հրատարակում և ձեռքբերում» ծրագրերի գծով ՀՀ 2016թ. պետբյուջեով նախատեսված հատկացումների օգտագործման ուղղությունները: ՀՀ կրթության և գիտության նախարար Լևոն Մկրտչյանը նշեց, որ արդյունքում` տարրական դասարանների աշակերտները կապահովվեն անվճար դասագրքերով և ուսումնական գրականությամբ, ավագ դպրոցները կհամալրվեն նոր դասագրքերով, ռազմագիտության կաբինետները կհամալրվեն նոր ուսումնական նյութերով:
«Ծրագրով կրթության առանձնահատուկ պայմանների կարիք ունեցող երեխաները կապահովեն նախատեսված ծրագրերով, ձեռնարկներով, ուսումնական այլ նյութերով, ինչը կնպաստի սովորողների ուսումնական գործընթացի արդյունավետ կազմակերպմանը»,- ասաց Մկրտչյանը:
Հարցի հետ կապված ՀՀ վարչապետ Հովիկ Աբրահամյանը հորդորեց հնարավորինս բացառել մեկ անձից կատարվող գնումները և անցնել բանակցային եղանակով գնումների կատարման:
