ԵՊՀ աստվածաբանության ֆակուլտետի դասախոս Վարդան Խաչատրյանն այսօր լրագրողների հետ հանդիպման ժամանակ խոսեց ԱԺ-ում հավանություն ստացած գենդերային օրենքի մասին, որն արդեն պատրաստ է, մնում է հաստատվի նախագահի ստորագրությամբ: Օրինագծում «գենդեր» բառը ներկայացվում է որպես ձեռքբերովի և սոցիալապես ամրագրված վարքագիծ: Վ. Խաչատրյանը համաձայն չէ նման ձևակերպման հետ, որովհետև գենդերը ոչ թե ձեռքբերովի, այլ ի ծնե հատկանիշ է. «Մենք ուշացանք այդ օրինագծի ընդունումից, հիմա ուզում ենք դիմել նախագահին, որպեսզի չստորագրի, հակառակ դեպքում միասեռականների օրենքի ընդունման համար պարարտ հող ենք ստեղծում»:
Նա նշեց, որ «Խտրականության դեմ օրենքի» նախագիծն արդեն մտել է ԱԺ, որտեղ քննարկվելու է նաև միասեռականների մասին օրենքը. «Եթե այդ օրենքն ընդունվի, գեյերի շքերթ կանցկացվի Երևանի փողոցներում»:
Բանախոսի հավաստիացմամբ՝ եթե ընդունվի նման օրենք, ուրեմն մեր ԱԺ-ի վրա ճնշումներ են գործադրվել, ինչպես եղավ Մոլդովայում, Վրաստանում և այլ երկրներում:
Վ. Խաչատրյանն անընդունելի է համարում միասեռականների աշխատանքը մանկապարտեզներում, դպրոցներում, որտեղ կրթվում և դաստիարակվում են երեխաները. «Ինչպե՞ս կարելի է նման մարդկանց տեղ տալ հասարակության մեջ, էլ չեմ ասում՝ աշխատանք: Պետք է ամեն կերպ պայքարել նման օրենքի ընդունման դեմ»:
