Կարմիր խաչի միջազգային կոմիտեն Ստեփանակերտի հիվանդանոցին վիրավորների համար փոխանցել է բժշկական փաթեթներ: Այս մասին չորեքշաբթի հայտնել է Կարմիր խաչի միջազգային կոմիտեի երևանյան պատվիրակության հաղորդակցության հարցերով ծրագրերի ղեկավար Զառա Ամատունին:
«Կարմիր խաչի միջազգային կոմիտեն մշտական կապի մեջ է Լեռնային Ղարաբաղի առողջապահության համակարգի հետ և պատրաստ է անհրաժեշտ աջակցություն տրամադրել: Նախօրեին Կարմիր խաչի միջազգային կոմիտեն Ստեփանակերտի հիվանդանոցին վիրավորների համար փոխանցել է բժշկական փաթեթներ (դեղամիջոցներ և վիրակապական նյութեր)»,- ասել է Ամատունին:
Նա նշել է, որ կոմիտեն ուշադիր հետևում է ԼՂ-ում իրավիճակին:
Ամատունու խոսքով՝ կարիքների և պահանջվող աջակցության մասշտաբների գնահատման գործընթացը շարունակվում է: «Մեր կազմակերպությունը տեղերում աշխատում է ընտանիքների հետ՝ նրանց կարիքները գնահատելու համար»,- ասել է Ամատունին:
Նա հայտնել է, որ ավելի հեռու հեռանկարում քննարկվում է քաղաքացիական ենթակառուցվածքի՝ ներառյալ տուժած շրջաններում բնակարանների վերականգնման, նաև գյուղատնտեսական գործունեության վերսկսմանն աջակցելու հնարավորությունը:
