ԱՄՆ-ի հայկական խորհուրդը (ԱՀԽ) և Եվրոպայի հայկական խորհուրդը (ԵՀԽ) հորդորել են ԵԱՀԿ Մինսկի խմբին անհապաղ գործողությունների դիմել` դատապարտելու ադրբեջանական վարչակարգի սադրանքները Լեռնային Ղարաբաղի Հանրապետությունում:
ԱՀԽ-ն և ԵՀԽ-ն ուշադրություն են հրավիրել այն փաստի վրա, որ շփման գծում լարվածությունը սկսվել է Ադրբեջանի նախագահ Իլհամ Ալիևի կողմից ԱՄՆ փոխնախագահ Ջո Բայդենի և պետքարտուղար Ջոն Քերիի հետ հանդիպումներից հետո: «Ցավոք, այդ հանդիպումների ընթացքում ղարաբաղյան հակամարտության խաղաղ կարգավորման շուրջ հնչած կոչերն անտեսվեցին Ալիևի կողմից: Վերջին մի քանի ամիսների ընթացքում մենք պարբերականորեն բարձրացրել են մեր մտահոգություններն ադրբեջանական կողմից ղարաբաղա-ադրբեջանական շփման գծում և Հայաստանի հետ սահմանին հրադադարի ռեժիմի խախտման վերաբերյալ: Սակայն թե՛ ԱՄՆ-ն, թե՛ Ֆրանսիան շարունակում էին ԵԱՀԿ Մինսկի խմբի շրջանակների ներսում և դրսում լուռ մնալ ու չդատապարտել ադրբեջանական բռնապետության ոտնձգություններն ընդդեմ տարածաշրջանի անկախության»,- ասվում է տարածած հաղորդագրությունում:
Հեղինակները հորդորել են Մինսկի խմբին և մասնավորապես դրա համանախագահներ ԱՄՆ-ին ու Ֆրանսիային դադարեցնել համահավասար հայտարարությունների հնչեցումը և դատապարտել ադրբեջանական զինուժի բացահայտ ագրեսիան:
