Բրյուսելում պայթյունները ցնցեցին ողջ Եվրոպան, սակայն զարմանալի չէ, որ հենց Բելգիան դարձավ ահաբեկիչների թիրախ: Այս մասին գրում է The Guardian-ը:
Այդ փոքր երկրում արմատական ակտիվության կենտրոնացման համար նախադրյալները քիչ չեն՝ գրում է պարբերականը: Դրանցում առանձնանում են մուսուլմանական փոքրամասնության վատ ինտեգրումը, գործազրկության բարձր մակարդակը, զենքի ազատ տարածումը, զարգացած տրանսպորտային և հաղորդակցական ցանցերը, ինչպես նաև քաղաքական անկայունությունը: Բելգիայի իշխանությունների պատշաճ զգոնության բացակայության հետ այդ ամենը հանգեցրին ներկայիս դեպքերին:
The Guardian-ը նշում է, որ ահաբեկչության խնդրի արմատները հասնում են դեռևս 80-90-ական թվականներ, երբ Մերձավոր Արևելքում հուզումներ սկսվեցին: Շատ փորձագետներ նաև հակված են Ֆրանսիայում և Բելգիայում ահաբեկչության սկիզբը կապել Ալժիրում քաղաքացիական պատերազմի հետ:
Անցած տասնամյակի առաջին կեսին, երբ ահաբեկիչները հարվածեցին Լոնդոնին և Մադրիդին, ծայրահեղականների դեմ պայքարի ուժեղացմանը Բելգիայում պատշաճ ուշադրություն չէր հատկացվում, մինչդեռ նրանք թափ էին հավաքում՝ գրում է թերթը:
Պատերազմը Սիրիայում արագացրեց այդ գործընթացը՝ շարունակում է պարբերականը: Մոտ 500 բելգիացի մեկնել է Մերձավոր Արևելք՝ կռվելու, դա ամենամեծ թիվն է եվրոպական բոլոր երկրների մեջ: Մեծ մասը հարեցին ԴԱԻՇ-ին, ոմանք՝ «Ջեբհաթ ան-Նուսրային»: Նրանք Եվրոպա վերադարձան՝ արդեն պատրաստ ահաբեկչական հարձակումների:
