Թուրքական Dünya Bülteni լրատվական կենտրոնի փոխանցմամբ՝ Սիրիայի հյուսիսում ձևավորվել է «նոր Ղանդիլ» (լեռնաշղթա Հյուսիսային Իրաքում, որի վրա գտնվում են PKK-ի ճամբարները)։
PKK-ը, օգտվելով Սիրիայի ներքաղաքական պատերազմից առաջացած քաոսից, իր սիրիական թև PYD-ի վերահսկած տարածքներում ստեղծել է 33 նոր ճամբար, որոնցում ռազմական ուսուցում են անցնում զինյալները։
Այդ մասին հայտնել են Թուրքիայի անվտանգության մարմիններում լրատվամիջոցների աղբյուրները։ Նրանք հայտնել են, որ Թուրքիայի զինված ուժերի զեկույցներում նշված է, որ նախորդ տարվա հունիսից Ղանդիլի ու շրջակայքի ճամբարներին թուրքական օդուժի հարվածներից PKK-ը կրել է մեծ վնասներ։
Դա հանգեցրել է նրան, որ PKK-ը, օգտվելով Սիրիայում տիրող քաոսից, իր ուժերի մի մասը տեղափոխել է Սիրիայի հյուսիս՝ PYD-ի վերահսկած տարածքներ։
Հիշեցնենք, որ Անկարայի ահաբեկչությունից հետո Թուրքիայի նախագահ Ռեջեփ Էրդողանը հայտարարել էր, որ իրենք կարող են ցամաքային զորքերով շարժվել մինչև Ղանդիլ՝ PKK-ին վերջ դնելու համար, որին կասկածում էին Անկարայի պայթյունի կազմակերպման համար։
Ավելի վաղ Էրդողանը խոստացել էր թույլ չտալ Սիրիայի հյուսիսում «նոր Ղանդիլի» առաջացում։
